سسرال کے ’ظلم‘ سے تنگ آکر خاتون کی خودکشی کی کوشش

ریاست جموں کشمیر کے ضلع رام بن میں ایک جواں سالہ خاتون نے سسرال والوں کی مبینہ زیادتیوں سے تنگ آکر خودکشی کی کوشش کی۔

نمائندے کے مطابق ضلع رام بن کے دور دراز علاقہ احدواہ میں تیس سالہ ششمہ دیوی نے زہریلی شئی کھا کر خود کو ہلاک کرنے کی کوشش کی۔

صبح قریب سات بجے افراد خانہ نے ششمہ کو بے ہوش پایا تو انہوں نے اسے فوری طور ضلع اسپتال رام بن منتقل کر دیا۔

ضلع رام بن میں ابتدائی علاج و معالجے کے بعد ڈاکڑوں نے اسے جموں کے میڈیکل کالج اسپتال منتقل کر دیا جہاں اسکی حالت نازک بتائی جا رہی ہے۔

متاثرہ کے بھائی شیوندر کمار کا کہنا تھا کہ اُسکی بہن کو سسرال میں تنگ کرتے رہتے ہیں، اُسے اذیتیں دیتے ہیں۔

شیوندر نے الزام عائد کیا کہ اُسکی بہن کے ساتھ مار پیٹ بھی کی گئی اور ان سب سے تنگ آکر اُسنے خودکشی کی کوشش کی۔

انہوں نے اس معاملے کی پختہ چھان بین کرنے کا مطالبہ کرتے ہوئے کہا کہ ’’ششمہ کو یہ قدم اٹھانے پر مجبور کرنے والوں کے خلاف کارروائی کی جانی چاہئے۔‘‘