ضلع رامبن کے سب ڈویژن رامسو کی پنچائت سوجمتنہ گاؤں کوٹ کے رہنے والے ثاقب جبار اپنے اسکول کے دنوں سے ہی کافی پریشانیاں اٹھا رہے ہیں۔ بالآخر اپنے شوق و لگن اور تندہی سے انہوں نے بارہویں جماعت کے امتحانات میں سکنڈ ڈویژن سے کامیابی حاصل کی ہے۔
تعلیم حاصل کرنے کے شوق و جذبے سے پُر ثاقب جبار نے اسکول کی تعلیم حکومت و انتظامیہ سے مدد کے انتظار میں مکمل کرلی۔ اب بارہویں کا امتحان بھی پاس کر لیا، تاہم اب تک انہیں انتظامیہ کی جانب سے کوئی سواری نہیں ملی ہے۔
ثاقب ابھی بھی پر امید ہیں کہ کالج کی تعلیم حاصل کرنے کے لیے حکومت و انتظامیہ ان کی مدد کرے گی۔ انہوں نے انتظامیہ سے اپیل کی ہے کہ ان کے والد نہایت ہی غریب ہیں۔ ان کی ایک بہن بھی معذور ہے اور بی پی ایل کنبے کے لیے تعلیم کا جاری رکھنا کافی مشکلات سے بھرا رہتا ہے۔ اس لیے حکومت و انتظامیہ ان کا تعاون کرے۔
اپنے جذبے اور والدین کی مدد سے بارہویں جماعت میں اچھے نمبرات حاصل کرنے کے بعد ثاقب جیسے مختلف بچوں نے اعلیٰ تعلیم کے خواب سجائے ہوں گے۔ اس لیے حکومت و انتظامیہ کی ذمہ داری بنتی ہے کہ وہ اس طرح کے طلبہ کا خاص خیال رکھے اور انہیں تعلیمی میدان میں پیش آنے والی ہر مشکل کو حل کرنے میں ان کی مدد کرے، تاکہ وہ بھی سماج میں باعزت زندگی گزار سکیں۔