رامبن: سڑک حادثے میں ایک شخص ہلاک، 12 افراد زخمی

ضلع رام بن میں سرینگر- جموں قومی شاہراہ پر ایک دلدوز سڑک حادثے میں ایک شخص ہلاک جبکہ 12 افراد زخمی ہو گئے۔ زخمیوں میں سے دو افراد کی حالت نازک بتائی جا رہی ہے۔

سرینگر - جموں قومی شاہراہ پر پیر کی صبح سڑک حادثہ میں ایک شخص ہلاک اور 12 زخمی ہو گئے۔

رام بن پولیس کے مطابق ایک منی بس زیر رجسٹریشن نمبر PB07BT/8324 جموں سے سرینگر کی جانب جا رہی تھی کہ سرینگر- جموں شاہراہ پر چمبلواس کے مقام پر مخالف سمت سے آ رہی ایک مال بردار ٹرک زیر رجسٹریشن نمبر JK13C /4760 کے ساتھ ٹکرا گئی جس کے نتیجہ میں ڈرائیور سمیت 13 مسافر زخمی ہو گئے۔

حادثہ کے فوراً بعد پولیس اور مقامی رضاکاروں نے بچاؤ مہم شروع کرکے زخمیوں کی سب ضلع ہسپتال بانہال منتقل کیا جہاں سے تین شدید زخمیوں کو جی ایم سی اننت ناگ ریفر کر دیا۔

اسپتال لے جاتے ہوئے سجاد احمد ولد عبد القیوم کی راستے میں ہی موت واقع ہو گئی جبکہ دو دیگر افراد کی حالت تشویشناک بنی ہوئی ہے۔

زخمی ہونے والے دیگر افراد میں ڈرائیور کرنجیت سنگھ، گجندر سنگھ، محمد یعقوب، ستیش کمار، نذیر احمد، شاہ نواز، امایش سنگھ، محمد انور، طاہر احمد اور شکیل احمد شامل ہیں۔

ذرائع کے مطابق منی بس میں سوار افراد بجنور، اتر پردیش سے وادی کشمیر مزدوری کی غرض سے جا رہے تھے۔

پولیس نے اس ضمن میں ٹرک ڈرائیور کبیر احمد خان ولد محمد حسین خان کو گرفتار کر لیا ہے، وہیں پولیس اسٹیشن بانہال میں کیس درج کر کے مزید تحقیقات شروع کر دی گئی ہے۔