رامبن: ایندھن کی قیمتوں میں اضافے کے خلاف کانگریس کا احتجاج

ضلح رامبن میں احتجاج کے دوران کانگریس کارکنان نے جنرل بس اسٹینڈ سے جامعہ مارکیٹ تک ریلی نکالی اور مرکزی حکومت کے خلاف زوردار نعرہ بازی کی۔

جموں و کشمیر کے ضلح رامبن میں کانگریس نے جائیداد ٹیکس اور بڑھتی مہنگائی کے خلاف احتجاجی مظاہرہ کیا۔ کانگریس کارکنان نے پیٹرول اور ڈیزل کی بڑھتی قیمتوں میں اضافے کے خلاف آواز بلند کی۔

کانگریس کے ضلع صدر رامبن فاروق احمد کٹوچ نے کہا 'ضروری اجناس کی بڑھتی قیمتوں کے درمیان کانگریس نے مرکزی حکومت کی توجہ مبذول کرانے کے لئے ضلح بھر میں 15 فروری سے 30 مارچ تک ایک احتجاجی مہم شروع کی ہے'۔

انہوں نے کہا 'ہم اس مہم کو دونوں مرکزی خطوں لکھن پور سے لداخ تک لے جائیں گے اور حکومت کو لوگوں کو مدد فراہم کرنے پر مجبور کریں گے۔'

احتجاج کے دوران کانگریس ورکرز نے جنرل بس اسٹینڈ سے جامعہ مارکیٹ تک ریلی نکالی اور مرکزی حکومت کے خلاف جم کر نعرہ بازی کی۔

فاروق احمد کٹوچ نے کہا 'ہر بار حکومت کی جانب سے عوام کو ٹیکس کی شکل میں ایک تحفہ دیا جاتا ہے اور کانگریس پارٹی اس کے خلاف احتجاج جاری رکھے گی تاکہ حکومت ان فیصلوں کو واپس لے کیونکہ اس سے پہلے بھی حکومت نے سڑکوں، پانی اور بجلی کے استعمال پر ٹیکس عائد کیا ہوا ہے'۔