رام بن بینک میں ’نقب زنی‘ سے عوام کو مشکلات

ریاست جموں و کشمیر کے ضلع رام بن میں جے کے بینک کی شاخ پر آئے ہوئے کھاتہ داروں کو اُس وقت مایوں ہوکر لوٹنا پڑا جب انہیں یہ خبر دی گئی کہ بینک میں نقب زنی ہوئی ہے۔

پیر کی صبح جب عملہ بینک پہنچا تو انہوں نے ٹوٹے تالے اور شٹر دیکھ کر فوراً پولیس کو خبر کی۔ اس دوران کھاتہ داروں کو سخت مشکلات کا سامنا کرنا پڑا۔

بینک میں ’ناقص‘ حفاظتی انتظامات کو لیکر کھاتہ داروں نے تشویش کا اظہار کیا۔

مقامی باشندوں نے حیرانگی کا اظہار کرتے ہوئے کہا کہ ’’اگر نقب زنی اتوار رات کو یا پیر کی صبح ہوئی ہے تو بینک عملے کو اس کی خبر اتنی دیر سے کیوں ہوئی؟‘‘
انہوں نے بینک میں سیکورٹی گارڈ کی عدم موجودگی پر بھی حیرانگی کا اظہار کیا۔

بینک میں کس چیز کی چوری ہوئی ہے یا کتنا مال نقب زن اڑا کر لے گئے اس کی معلومات نہیں ہو سکی۔

اس ضمن میں رام بن پولیس نے معاملہ درج کرکے مزید کارروائی شروع کر دی ہے۔