راجوری: ڈرون بیچنے، خریدنے اور بنانے پر پابندی

ضلع مجسٹریٹ نے حکم نامے میں کہا ہے کہ جن لوگوں کے پاس ڈرون اور ہوا میں اڑائے جانے والے کھلونے ہیں وہ انہیں پولیس کے حوالے کر دیں۔

ضلع مجسٹریٹ راجوری نے ڈرونز اور فضا میں اڑائے جانے والے دوسرے کھلونوں پر پابندی عائد کر دی ہے۔ انہوں نے بدھ کے روز جاری کردہ ایک حکم نامے میں کہا کہ قوم دشمن عناصر یونین ٹریٹری کے بعض علاقوں میں ڈرونز اور فضا میں اڑائے جانی والی چیزوں کا استعمال کر کے لوگوں کو مالی و جانی نقصان پہنچانے کی کوشش کر رہے ہیں۔

ڈرون پر پابندی

موصوف ضلع مجسٹریٹ کا یہ حکم نامہ اس وقت سامنے آیا ہے، جب جموں شہر کے فوجی علاقوں میں گذشتہ چار روز سے ڈرونز کو مسلسل گردش کرتے ہوئے دیکھا جا رہا ہے۔ حکم نامے میں کہا گیا ہے کہ گذشتہ دس پندرہ برسوں سے دیکھا جا رہا ہے کہ سماجی و ثقافتی محفلوں میں ویڈیو اور فوٹو کھینچنے کے لیے چھوٹے ڈرون کیمروں کا استعمال کیا جا رہا ہے اور نوجوان طبقہ خاص طور پر ڈرون جیسے کھلونوں کا استعمال کرنے کا شوقین ہے۔'

اس حکم نامے کے مطابق موجودہ صورتحال کے پیش نظر اہم فوجی تنصیبات اور آبادی والے علاقوں میں فضائی اسپیس کے تحفظ کے لیے ضروری ہے کہ ڈرون اور فضا میں اڑائے جانے والے کھلونوں کے استعمال پر پابندی عائد کی جائے۔

ضلع مجسٹریٹ نے حکم نامے میں کہا ہے کہ جن لوگوں کے پاس ڈرون اور ہوا میں اڑائے جانے والے کھلونے ہیں وہ انہیں پولیس کے حوالے کر دیں۔ ایس ایس پی راجوری سے کہا گیا ہے کہ وہ اس حکم نامے پر عمل درآمد کو یقینی بنائیں۔