بجلی کا بل معاف کرنے کے سلسلے میں مظاہرہ

ضلع گنگا نگر کے علاقے نئی منڈی گھڑسانا میں سی پی ایم کارکنان نے کورونا وائرس کے سبب چھ ماہ کے لیے بجلی بل معاف کرنے کی اپیل کی ہے۔

کمیونسٹ پارٹی آف انڈیا (سی پی آئی-ایم) کےملک گیر نعرے کے تحت راجستھان کے ضلع گنگا نگر کے نئی منڈی گھڑسانا سب ڈویژن ہیڈ کوارٹر پر سی پی ایم کارکنوں کے ذریعہ کورونا وائرس لاک ڈاون کے سبب چھ مہینے کا بجلی بل معاف کئے جانے کی مانگ کرتے ہوئے آج مظاہرہ کیا گیا۔

انوپ گڑھ اسمبلی حلقہ سے سی پی آئی (ایم) کے سابق رکن پون دگل کی قیادت میں کافی تعداد میں سی پی ایم کے کارکن مظاہرہ کرتے ہوئے سب ڈویژن افسر کے دفتر پر پہنچے۔

مطاہرین کے ایک وفد نے وزیراعلی کے نام ایس ڈی ایم کو میمورنڈم سونپا۔

میمورنڈم میں کہا گیا ہے کہ عالمی وبا کے سبب مسلسل لاک ڈاون سے غریب اور کنبوں کی حالت قابل رحم ہوگئی ہے۔ ان کے سامنے روزی روٹی کا بحران ہے ایسے میں بجلی کا بل ادا کرنا ممکن نہیں ہے۔

لوگوں کی مانگ ہے کہ گھریلو اور صنعتی بجلی کے بل چھ مہینے کے لیے معاف کیا جائے۔