ریاست راجستھان کے شہر اجمیر میں واقع معروف درگاہ خواجہ معین الدین چشتیؒ کے احاطہ میں 811 ویں عرس تزک و احتشام کے ساتھ منایاجارہا ہے،اس موقع پر مسلم راشٹریہ منچ کے چیئرمین اندریش کمار کی جانب سے چادر پیش کی گئی۔اورملک میں امن اور بھائی چارے کے لیے دعائیں مانگی گئیں۔ اندریش کمار کی جانب سے چادر لے کر ڈاکٹر عمران چودھری اور ان کے ساتھی پہنچے تھے۔ انہوں نے پہلی رجب المرجب یعنی کے عرس کے پہلے روز نماز ظہر سے قبل چادر پیش کر کے ملک میں امن و امان کے لئے خصوصی دعا ئیں مانگی گئیں۔
اس موقع پرڈاکٹر عمران چودھری نے اندریش کمار کا عرس کے تعلق سے پیغام پڑھ کر سنایا۔ درگاہ انتظامیہ کی جانب سے عمران چودھری اور ان کے ساتھیوں کو دستارباندھ کرتبرکات پیش کی گئی ۔انہوں نے اپنے پیغام میں کہا کہ میری دعا ہے کہ انسانوں میں نفرت، فساد اور جھگڑے نہ ہوں بلکہ محبت، بھائی چارہ ہو،اس کے لیے سب سے بہتر طریقہ یہ ہے کہ ہر شخص اپنے اپنے مذہب پر عمل کرے، دوسرے کے شرعی معاملات میں مداخلت نہ کرے۔ دوسروں پر تنقید نہ کریں۔ مذہب تبدیل نہ کریں بلکہ تمام مذاہب کا احترام کریں۔ تمام انسان ایک مالک کی اولاد ہیں، کوئی اچھوت نہیں ہے۔