مدرسہ پیرا ٹیچرز حکومت سے ناراض

ریاست راجستھان کے مدرسوں میں بچوں کو پڑھانے والے مدرسہ پیرا ٹیچرز کی سالانہ تنخواہ میں گذشتہ تین برسوں سے اضافہ نہیں کیا گیا ہے جس کی وجہ سے پیرا ٹیچرز میں بے چینی ہے۔

پہلے ہر برس مدرسہ پیرا ٹیچرز کی تنخواہ میں اضافہ کیا جاتا تھا لیکن اب وہ سلسلہ پوری طرح سے بند کر دیا گیا ہے۔

پیرا ٹیچرز کو اس برس کے بجٹ میں کانگریس حکومت سے کافی امیدیں وابستہ تھیں لیکن کانگریس حکومت نے بجٹ میں انہیں کچھ بھی نہیں دیا ہے جس کی وجہ سے اب پیرا ٹیچرز تمام اراکین اسمبلی اور ریاست کے وزراء کے سامنے اپنے غم و غصے کا اظہار کر رہے ہیں۔

اردو اساتذہ تنظیم کے ریاستی صدر امین قائم خانی کا کہنا ہےکہ 'راجستھان کے تین ہزار رجسٹرڈ مدرسوں میں چھ ہزار کے قریب پیرا ٹیچرز کانٹریکٹ کی بنیاد پر اپنی خدمات انجام دے رہے ہیں اور ان کی تنخواہ سات ہزار روپے سے لے کر نو ہزار روپے تک ہے۔'

قائم خانی کا کہنا ہے کہ 'گذشتہ تین برسوں سے اضافہ نہیں کیے جانے کی وجہ سے پیرا ٹیچرز کو پریشانی ہو رہی ہے، اس کے علاوہ ای پی ایف کم کاٹا جا رہا ہے جبکہ ای پی ایف زیادہ کاٹنا چاہیے۔'

انہوں نے حکومت سے درخواست کی کہ 'تعلیمی نمائندوں' کے برابر تنخواہ دی جائے۔