کورونا وائرس: جے پور کا چہار دیواری علاقہ پوری طرح سے سیل

راجستھان کے دارالحکومت جے پور کے رام گنج علاقہ میں مسلسل ایک کے بعد ایک کورونا وائرس کے مریض سامنے آرہے ہیں، جس کے بعد پولیس انتظامیہ کی جانب سے ایک بڑا فیصلہ لیتے ہوئے جے پور کے چہار دیواری علاقہ کو پوری طرح سے سیل کر دیا گیا ہے۔

ریاست راجستھان کے دارالحکومت جے پور کے چہار دیواری علاقہ کو سیل کرنے کے بعد اب نہ تو اندر کوئی جا سکتا ہے اور نہ ہی باہر آسکتا ہے۔ جو لوگ یہاں سے باہر گئے ہیں ان تمام لوگوں کو یہ اطلاع کر دی گئی ہے کہ وہ اپنے گھروں میں چلے جائیں، ورنہ ان کو باہر ہی رکنا پڑ سکتا ہے۔ حالانکہ یہاں پر کچھ ایسے لوگ بھی ہیں جن پر کسی طرح سے پابندی نافذ نہیں کی گئی ہے۔ ان میں پولیس کے جوان، صحافی، بجلی محکمے کے نمائندے، نگر نگم کے ملازمین سمیت کچھ محکمیں شامل ہیں۔

واضح رہے کہ جے پور کے رام گنج علاقہ میں گزشتہ دو روز میں 13 کورونا وائرس کے مریض پائے گئے ہیں۔ پہلا مثبت معاملہ سامنے آنے کے بعد ہی رام گنج علاقے میں کرفیو لگا دیا گیا تھا۔

واضح رہے کہ ریاست راجستھان میں اب تک 93 معاملے سامنے آچکے ہیں۔ ان میں پورے راجستھان میں پوزیٹیو مریضوں کی تعداد 76 ہے اور ایران سے آئے بھارتیوں کی تعداد 17 ہے۔

بتا دیں کہ آج ہی ضلع اجمیر کے ایک ہی خاندان کے پانچ افراد میں کورونا پوزیٹیو کیس سامنے آئے ہیں۔