جے پور: مہنگائی کے خلاف کانگریس سڑکوں پر

بڑھتی ہوئی مہنگائی کے خلاف کل (بدھ) راجستھان کےدارالحکومت جے پور میں کانگریس پارٹی خواتین ونگ مرکزی حکومت کے خلاف احتجاج کرے گی۔

کانگریس کے اعلی رہنماؤں کی جانب سے اس بات کا اعلان کیا گیا ہے کہ جس طرح سے ملک میں مہنگائی میں اضافہ ہو رہا ہے اس کے خلاف کانگریس پارٹی کی جانب سے 7 جولائی سے 17 جولائی تک مہم چلائی جائے گی اور اس مہم کے تحت مرکزی حکومت کو یہ بتایا جائے گا کہ مہنگائی سے عوام کا جینا دشوار ہو چکا ہے۔

اس مہم کا آغاز کرتے ہوئے کل (بدھ) خواتین ونگ کی جانب سے احتجاجی مظاہرہ کیا جائے گا۔

کانگریس خواتین محاذ کی نائب صدر زیبا خان نے ای ٹی وی بھارت سے بات چیت کے دوران بتایا کہ جس طرح سے مہنگائی میں اضافہ ہو رہا ہے اس کی وجہ سے عوام کا جینا دشوار ہو چکا ہے۔ پیٹرول اور ڈیزل کی قیمتیں آسمان چھو رہی ہیں جبکہ رسوئی گیس کی قیمت میں مسلسل اضافے سے عوام ایک بار پھر چولہے کی جانب بڑھ رہی ہے۔