ریاست راجستھان کے جے پور میں کورونا وبا کے سبب کئی ماہ سے بند جامع مسجد میں آج عوامی فاصلے کے ساتھ اجتماعی طور پر جمعہ کی نماز ادا کی گئی۔
اطلاع کے مطابق جے پور کے جوہری بازار علاقے میں واقع جامع مسجد میں پہلی مرتبہ مختصر لوگوں نے اجتماعی طور پر نماز ادا کی، وہیں اس جمعہ کی نماز میں ریاستی حکومت کی جانب سے جو ایڈوائزری جاری کی گئی تھی اس کا مکمل طور پر خیال رکھا گیا۔
مسجد میں داخل ہونے والے تمام نمازیوں کی دروازوں پر ہی تھرمل اسکریننگ کی گئی اور ہاتھوں کو سینیٹائز کرنے کے بعد مسجد میں داخلے کی اجازت دی گئی، وہیں نمازیوں کے درمیان عوامی فاصلہ بھی صاف نظر آیا۔
اس دوران دارالحکومت جے پور کے چار دروازے علاقے میں واقع مولانا صاحب کی درگاہ کے نائب سجادہ نشین سید عزیزالدین ضیائی نے بتایا کہ جو لوگ اپنے چہرے پر ماسک لگا کر آرہے ہیں ان ہی کو نماز جمعہ میں داخلہ کی اجازت دی جارہی ہے، وہیں تمام لوگوں سے سینیٹائز کرنے کی اپیل بھی کی جا رہی ہے۔