عیسائی برادری بھی سی اے اے مخالف احتجاج میں شامل

ریاست راجستھان کے دارالحکومت جئے پور میں واقح شہید اسمارک پر شہریت ترمیم قانون کے خلاف چل رہے غیر معینہ احتجاج کو اب عیسائی برادری کے لوگوں کی حمایت حاصل ہے۔

جئے پور میں بھی گزشتہ روز سے شہریت ترمیم قانون کے خلاف چل رہے احتجاج کو اب مختلف تنظیموں کا ساتھ ملتا نظر آرہا ہے۔ آج دوپہر کو عیسائی برادری کے لوگوں نے شہید اسمارک پہنچ کر اس احتجاج میں اپنی حصے داری درج کرائی۔

اس موقع پر عیسائی برادری کے تمام اعلی عہدیداراں نے مسلم طبقے کی جانب سے جاری اس احتجاج میں شامل ہوکر مرکزی حکومت کے خلاف نعرے بازی کی اور ہر قسم کی مدد فراہم کرنے کی بات کہی۔
عیسائی برادری کے عہدیداران نے کہا کہ جب تک مرکزی حکومت سی اے اے، این آر سی اور این آر پی کو واپس نہیں لیتی تب تک ہم اس قانون کی مخالفت کریں گے۔اس احتجاج میں کثیر تعداد میں خواتین اور الگ الگ تنظیموں کے ذمہ داران موجود رہے۔

واضح رہے کہ 31 جنوری سے جئے پورکے شہید اسمارک پر سی اے اے، این آر سی اور این پی آر کے خلاف مسلسل احتجاج جاری ہے۔

عیسائی برادری کے لوگوں نے بات چیت کرتے ہوئے کہا کہ یہ نیا قانون ملک کو تقسیم کرتے ہوئے نظر آرہا ہے۔ اس لیے ہم اس کی سخت مخالفت کر رہے ہیں ۔ جب تک اس قانون کو واپس نہیں لیا جاتا تب تک ہماری حمایت ان خواتین کو دی جاتی رہے گی۔