مہرولی سے قلندروں کا قافلہ عرس کا پیغام لے کر پہنچا

ریاست راجستھان کے شہر اجمیر میں خواجہ صاحب کے 808 ویں سالانہ عرس کا پیغام لے کر مہرولی، دہلی سے قلندروں اور ملنگوں کا قافلہ آج اجمیر پہنچا۔

قافلے نے شام کو عصر کی نماز کے بعد جلوس کی شکل میں درگاہ شریف پہنچ کر چھٹی اور جھنڈے کے نشان پیش کیے۔ چھڑی اور جھنڈے کا جلوس وادی رشی میں واقع چلہ سے شروع ہوا جو گنج گردوارہ، دہلی گیٹ، دھان منڈی، درگاہ بازار ہوتے ہوئے درگا ہ کے نظام گیٹ پہنچا۔

ڈھول دھماکوں کے ساتھ شروع ہوئے اس جلوس میں قلندر پورے راستے حیرت انگیز کرتب دکھاتے ہوئے چل رہے تھے جنہیں دیکھنے کے لیے زائرین کے علاوہ دیگر لوگوں کا ہجوم لگ گیا۔

درگاہ شریف پہنچنے پر انکی قیادت کرتے ہوئے زیارت کرائی گئی۔ چھڑیاں پیش کرنے کے بعد قلندر الگ الگ ٹھکانوں پر چلے گئے۔ یہ تمام ایک بار پھر چھٹی والے دن قل کی رسم کے وقت جمع ہوں گے۔