جالندھر: پنجاب میں جالندھر لوک سبھا ضمنی انتخاب کے پیش نظر ضلع مجسٹریٹ جسپریت سنگھ نے انتخابی عمل کے صحیح انعقاد کے لیے کئی اہم احکامات جاری کیے ہیں۔ہفتہ کو ڈسٹرکٹ مجسٹریٹ کے جاری کردہ احکامات کے مطابق 8 مئی کو شام 6 بجے انتخابی مہم روک دی جائے گی اور پانچ سے زائد افراد کے ساتھ جلسہ کرنے پر پابندی ہوگی۔ اس دوران صرف چار افراد کے ساتھ گھر گھر مہم چلائی جا سکتی ہے۔ انہوں نے واضح کیا کہ جالندھر ضلع میں جن سیاسی قائدین، افسران اور پارٹی کارکنوں کے ووٹ نہیں ہیں، انہیں 8 مئی کی شام 6 بجے سے 10 مئی کو پولنگ کا عمل مکمل ہونے تک لوک سبھا حلقہ سے باہر رہنا ہوگا۔ ضلع مجسٹریٹ نے کہا کہ پولنگ کے دن کوئی بھی سیاسی جماعت پولنگ اسٹیشن کے 100 میٹر کے اندر کوئی انتخابی مہم نہیں چلائے گی۔
اسی طرح ضلع میں 8 مئی کی شام 6 بجے سے 10 مئی تک ڈرائی ڈے ہوگا اور شراب کی فروخت نہیں ہوگی۔ ووٹوں کی گنتی کے دن 13 مئی کو شراب کی فروخت نہیں ہوگی۔ جاری کردہ احکامات کے مطابق ڈرائی ڈے کے دوران پولنگ ایریا میں کسی بھی ہوٹل، کھانے پینے کی جگہوں، دکانوں اور دیگر مقامات، سرکاری و نجی مقامات پر شراب کی فروخت اور پیش کرنے پر پابندی ہوگی۔ اس دوران کلبوں، اسٹار ہوٹلوں، ریستوراں وغیرہ میں شراب کی فروخت پر پابندی ہوگی۔ بغیر لائسنس کے مقامات پر شراب ذخیرہ کرنے والوں کے خلاف ایکسائز ایکٹ کے تحت کارروائی کی جائے گی۔