حال ہی میں ہوئی شدید برفباری کے بعد جہاں پوری وادی میں بجلی بحران میں اضافہ ہوا ہے وہیں ترال سب ضلع میں بھی دو درجن سے زائد ٹرانسفارمرز خراب ہونے سے ایک وسیع آبادی گھپ اندھیرے میں ہے۔
اس سلسلے میں آج کچھمولہ کی آبادی نے ترال میں بجلی محکمے کے مقامی آفس کے باہر ایک خاموش احتجاج کیا اور انتظامیہ تک اپنی بات پہنچانے کی کوشش کی۔
احتجاجی مظاہرین کا کہنا ہے کہ ان کا ٹرانسفارمر برفباری کے بعد خراب ہو گیا ہے لیکن متعلقہ حکام اس کی مرمت میں تساہل پسندی سے کام لے رہے ہیں جسکی وجہ ایک بڑی آبادی کو اندھیرے میں زندگی گزارنے پر مجبور ہونا پڑ رہا ہے۔
احتجاج پر آمادہ لوگوں نے میڈیا سے گفتگو کرتے ہوئے بجلی محکمے کے ملازمین پر الزام عائد کیا کہ وہ اثر و رسوخ والے لوگوں کے ٹرانسفارمر کو جلد ٹھیک کرتے ہیں لیکن غریبوں کو تڑپایا جا رہا ہے۔
انہوں نے انتظامیہ سے اپیل کی کہ ان کے ساتھ انصاف کیا جائے اور انھیں ٹرانسفارمر جلد از جلد فراہم کیا جائے تاکہ وہ اپنی زندگی آرام سے گزار سکیں۔