پلوامہ کھیل میدان بنیادی سہولیات سے محروم

کھیل کود خاص کر کرکٹ کی سرگرمیوں کو فروغ دینے کے لیے کروڑوں روپے خرچ کیے جاتے ہیں، جن میں کھیل مسابقوں کا انعقاد اور کھیل میدانوں کی تعمیر و تجدید بھی شامل ہے۔ تاہم وادی کشمیر میں کئی ایسے کھیل کے میدان ہیں جہاں بنیادی سہولیات کا فقدان ہے۔

جنوبی کشمیر کے ضلع پلوامہ میں موجود کھیل کے میدان کی دیوار بندی نہ ہونے کے سبب کھلاڑیوں کا کہنا ہے کہ بعض اوقات مسافت میں کمی کے لیے کچھ افراد میدان کے بیچوں بیچ گاڑیاں گزار دیتے ہیں، جبکہ بعض افراد میدان کو پارکنگ کے طور پر بھی استعمال کرتے ہیں۔

مقامی کھلاڑیوں کے مطابق پلوامہ کا میدان ہموار نہ ہونے کے سبب بارشوں کے ایام میں یہ میدان تالاب کی شکل اختیار کر لیتا ہے۔

پلوامہ میدان میں بیت الخلاء تعمیر تو کیے گئے ہیں تاہم ان کی صاف صفائی کے لیے پانی کا مستقل انتظام نہ ہونے سے کھلاڑیوں کو دقتوں کا سامنا کرنا پڑتا ہے۔

اس ضمن میں نوجوان کھلاڑیوں نے حکام سے اپیل کی ہے کہ میدانوں کی تعمیر و مرمت کے حوالے سے سنجیدگی کا مظاہرہ کیا جائے تاکہ نوجوان کھلاڑی پریشیانیوں کے بغیر کھیل سرگرمیاں جاری رکھ سکیں۔