پانپور میں سخت بندشیں عائد

کورونا وائرس کے مثبت کیسز میں جاری اضافے کے پیش نظر قصبہ پانپور میں جمعہ کے روز سے ایک بار پھر سخت بندشیں عائد کی گئی ہیں۔

کورونا وائرس کے بڑھتے ہوئے واقعات کے پیش نظر جہاں وادی کشمیر کے بیشتر اضلاع میں لاک ڈون کا نفاذ عمل میں لایا گیا ہے، وہیں اس مہلک بیماری پر قابو پانے کے لیے آج پولیس نے قصبہ پانپور میں احتیاطی طور پابندیاں عائد کر دی ہیں۔

ایس ڈی پی او امتیاز احمد کی سربراہی میں آج پانپور پولیس نے قصبہ پانپور کا دورہ کر کے معائنہ کیا اور لوگوں سے گھروں میں بیٹھنے کی اپیل کی۔پولیس نے قصبہ پانپور میں جگہ جگہ پر رکاوٹیں کھڑا کر رکھی ہیں اور قصبہ کی طرف آنے جانے والی سڑکوں کو خاردار تار سے بند کر دیا گیا ہے جبکہ ٹرانسپورٹروں سے کرفیو پاس طلب کرنے کے بعد ہی انہیں آگے جانے کی اجازت دی جا رہی ہے۔

ایس ڈی پی او امتیاز احمد نے کہا کہ قصبہ میں پابندیاں عاٸد کرنے کا مقصد کورونا وائرس جیسی مہلک بیماری سے لوگوں کو بچانا ہے۔

انہوں نے کہا کہ کل سے اگر کوٸی بھی افراد یا گاڑی بلاضرورت کے گھر سے باہر ملی تو اُن کے خلاف سخت کاروآٸی عمل میں لآٸی جاۓ گی۔

بتا دیں کہ ضلع پلوامہ میں اب تک 774 افراد کورونا کے شکار ہوئے ہیں۔ ان میں سے 378 فعال ہیں جبکہ 388 صحتیاب ہو گئے ہیں۔ اس کے علاوہ 8 افراد کی کورونا وائرس کی وجہ سے موت ہوئی ہے۔