اونتی پورہ: پولیس یادگار دن کے سلسلے میں تقریب منعقد

ڈسٹرکٹ پولیس لائنز اونتی پورہ میں بدھ کو پولیس یادگار دن کے سلسلے میں ایک تقریب کا اہتمام کیا گیا جس میں پولیس کے اعلی افسران اور شہید جوانوں کے اہل خانہ نے شرکت کی۔

جنوبی کشمیر کے ڈسٹرکٹ پولیس لائنز اونتی پورہ میں بدھ کو پولیس یادگار دن کے سلسلے میں ایک تقریب منعقد کی گئی ہے جس میں پولیس کے اعلیٰ افسران سمیت شہداء کے اہل خانہ نے بھی شرکت کی۔

شہیدوں کو خراج عقیدت پیش کرتے ہوئے تقریب کے دوران ایک پریڑ کا اہتمام کیا گیا جس میں ایس ایس پی اونتی پورہ نے سلامی لی۔ پریڑ میں جموں کشمیر پولیس، آرمڈ پولیس اور سی آر پی ایف کے جوانوں نے حصہ لیا۔

پروگرام کے دوران اُن پولیس جوانوں کو خراج عقیدت پیش کیا گیا جنہوں نے فرائض کی انجام دہی کے دوران اپنی جانیں نچھاورکیں۔ اس موقع پر پولیس افسران کے علاوہ شہداء کے اہل خانہ نے بھی شہیدوں کی یاد میں شہید مارک پر گلباری کی۔

اس موقع پر ایس ایس پی اونتی پورہ طاہر سلیم نے اس دن کی مناسبت سے اہمیت پر روشنی ڈالتے ہوئے کہا: ’’ان جوانوں کی شہادت کو ہمیشہ ہمیشہ کے لئے یاد رکھا جائے گا جنہوں نے اپنی قوم کی خاطر ڈیوٹی کے دوران اپنی جانیں نچھاور کیں۔‘‘

انہوں نے شہید جوانوں کے اہل خانہ کے ساتھ اظہار ہمدردی کی اور ان کی شہادت کو قوم کے لئے ایک عظیم قربانی قرار دیا۔

قابل ذکر ہے کہ پورے ملک میں آج پولیس یاد گار دن منایا جا رہا ہے جس دوران دیگر ریاستوں کے ساتھ ساتھ جموں و کشمیر یونین ٹیریٹری میں بھی متعدد مقامات پر تقاریب کا اہتمام کیا گیا۔