Snow in Tral ترال کی سڑکوں سے برف صاف کرنے کیلئے میونسپلٹی کوشاں

ترال میں برف باری کی وجہ سے سڑکوں پر برف جمع ہو گیا ہے جس سے لوگوں مشکلات کا سامنا کرنا پڑ رہا ہے۔ وہیں آج صبح سے میونسپل کارپوریشن ترال کی جانب سے برف ہٹانے کا کام جاری ہے۔ Snow Clearing on Tral Road

پلوامہ: جموں و کشمیر کے ضلع پلوامہ کے ترال میں برفباری سے پیدا شدہ صورتحال سے جہاں انتظامیہ نے پہلے ہی کنٹرول روم قائم کیا ہے وہیں آج صبح سے ہی میونسپل کارپوریشن ترال کے ملازمین کو مشینری بس اسٹینڈ، ترال بالا، ترال پایین اور اسپتال روڈ پر برف صاف کرتے ہوئے دیکھا گیا۔ صدر میونسپل کارپوریشن ترال منظور احمد خان نے ازخود برف صاف کرنے کی مہم کی قیادت کی اور ملازمین پر زور دیا کہ وہ جلد از جلد برف ہٹانے کا کام کریں تاکہ عوام کو دقتوں کا سامنا نہ کرنا پڑے۔ اس موقعے پر متعدد عوامی وفود نے ترال ٹاون کے گلی کوچوں سے برف صاف کرنے کی مانگ کی جس پر صدر موصوف نے انہیں یقین دلایا کہ آج شام تک تمام راستے صاف کر دیے جائیں گے۔ اس موقعے پر سیکرٹری فاروق احمد کے علاوہ کونسلر نزیر احمد اور دیگر عہدیدار بھی موجود تھے۔

میڈیا کے ساتھ بات کرتے ہوئے صدر ایم سی ترال منظور خان نے بتایا کہ برفباری اگرچہ نیک شگون ہے تاہم آج صبح سے ہی میونسپل کارپوریشن ترال کا عملہ متحرک رہا جس دوران نہ صرف مشینری کو برف صاف کرنے کے لیے لگایا گیا بلکہ صفائی ملازمین کو بھی کام پر لگایا گیا، تاکہ ٹریفک کی نقل و حمل کو یقینی بنایا جائے۔ انہوں نے اس بات پر شدید ناراضگی کا اظہار کیا کہ کچھ لوگ گاڑیوں کو سڑکوں پر پارک کرتے ہیں جسکی وجہ سے مسافروں کو چلنے پھرنے میں دقتوں کا سامنا کرنا پڑ رہا ہے انہوں نے ترال ٹاون کے لوگوں کو یقین دلایا کہ آج شام تک تمام گلی کوچوں سے برف صاف کیا جائے گا۔

واضح رہے کہ اس وادی کشمیر کے دیگر علاقوں کی طرح سب ضلع ترال میں بھی برفباری کا سلسلہ آج صبح سے ہی شروع ہو چکا ہے جس کی وجہ سے معمولات زندگی متاثر ہو کر رہ گئی ہیں اور لوگ اپنے گھروں کے اندر ہی رہنے کو ترجیح دے رہے ہیں حالانکہ سڑکوں پر ٹریفک کی نقل و حمل جاری ہے اطلاعات کے مطابق ترال کے بالائی علاقوں نارستان، حاجن، زراڈی ہارڈ، ناگہ بل، کارمولہ میں شدید برفباری ہوئی ہے اور وہاں اب تک پانچ انچ برف جمع ہو چکی ہے میدانی علاقوں میں دو سے تین انچ برف جمع ہوئی ہے ادھر برفباری سے علاقے کے زمینداروں نے خوشی کا اظہار کیا ہے کیونکہ لمبے عرصے سے علاقے میں برفباری یا بارش نہیں ہوئی تھی جسکی وجہ سے سوکھا پڑنے کے امکانات بڑھ گیے تھے۔ تاہم آج کی برفباری نے کسانوں کے چہروں پر مسکراہٹ لائ ہے اور وہ اچھی فصلوں کی امید کر رہے ہیں۔ ادھر ترال انتظامیہ پہلے ہی کنٹرول روم قایم کیا ہےاور انتظامیہ پوری طرح تیار ہے اور مشینری کے ساتھ ساتھ ملازمین کو بھی تیار، رہنے کا حکم دیا گیا ہے تاکہ د عوام کو دقتوں کا سامنا نہ کرنا پڑے جبکہ عوامی سہولیات کے لیے کنٹرول روم بھی قایم کیا گیا ہے۔