Bear Attack In Tral ترال میں ریچھ کے حملے میں شہری زخمی

وادی کشمیر میں ان دنوں جنگلی جانوروں کے حملوں میں اضافہ دیکھا جارہا ہے۔ جنگلی جانوروں کے حملوں سے کئی افراد نے اپنی جانیں گواں دی جبکہ کئی افراد ہسپتال میں زیر علاج ہے۔

ترال:جنوبی کشمیر کے ضلع پلوامہ کے ترال علاقہ میں جنگلی جانوروں اور انسانی تصادم کی خبریں لگاتار موصول ہو رہی ہیں۔ریچھ اور تیندوں کی حملوں سے عوام میں تشویش پائی جا رہی ہے۔تازہ واقعہ میں جہاں گزشتہ دنوں کارمولہ کے محمد ایوب خان کو ریچھ نے حملہ کر کے زخمی کر دیا ہے۔ وہیں ہفتہ کے روز لری بل ترال میں ریچھ کے حملے میں ایک معمر شہری زخمی ہو گیا ہے۔

اطلاعات کے مطابق عمہ ڈار ولد غلام حسن نامی شہری اس وقت زخمی ہو گیا جب وہ اپنے گھر سے باہر نکلنے کی کوشش کر رہا تھا، اسی دوران ان پر ریچھ نے حملہ کیا اور زخمی کر دیا۔ اگرچہ زخمی شہری کو سب ڈسٹرکٹ ہسپتال پہنچایا گیا، جہاں اس کی ابتدائی مرہم پٹی کے بعد سرینگر کے صدر ہسپتال منتقل کیا گیا۔مقامی لوگوں نے بتایا کہ ترال علاقے میں کئی ریچھ گھوم رہے ہیں، حالانکہ کئی مرتبہ اس بارے میں وائلڈ لائف کو آگاہ بھی کیا گیا لیکن یہ سب بے سود ثابت ہورہا ہے۔

بتادیں کہ ترال علاقے میں گزشتہ برسوں کے دوران متعدد لوگ جنگلی جانوروں کے حملوں میں ہلاک ہوگئے ہیں جبکہ درجنوں افراد زخمی بھی ہوگئے ہیں۔ سرکار کی جانب سے ٹھوس اقدامات نہ کیے جانے سے عوامی حلقوں میں ناراضگی پائی جاتی ہے جبکہ عوامی حلقے محکمہ وائلڈ لائف کی کارکردگی پر سوالات کھڑے کر رہے ہیں۔