پلوامہ: سکیورٹی فورسز کی فائرنگ میں خاتون زخمی

جنوبی کشمیر کے ضلع پلوامہ کے اونتی پورہ میں سی آر پی ایف اہلکاروں نے ایک پرائیوٹ گاڑی پر گولیاں چلائیں جس کے نتیجے میں ایک خاتون زخمی ہو گئی ہیں۔

ضلع پلوامہ کے اونتی پورہ میں آج اس وقت کھلبلی مچ گئی جب سی آر پی ایف اہلکاروں نے ایک پرائیوٹ گاڑی پر گولیاں چلائیں۔ فائرنگ کے نتیجہ میں ایک خاتون زخمی ہوگئی ہیں۔

تفصیلات کے مطابق اونتی پورہ شاہراہ پر تیز رفتار سے جا رہی ایک 'مشکوک' ویگنار گاڑی پر فائرنگ کی جس کے نتیجے میں گاڑی میں سوار مرن پلوامہ کی ایک خاتون جاسیہ دختر پرویز احمد زخمی ہو گئیں۔ زخمی خاتون کو فوری طور پر پی ایچ سی اونتی پورہ میں علاج معالجے کے لیے بھرتی کیا گیا ہے۔

پولیس نے بیان جاری کرتے ہوئے کہا کہ اونتی پورہ چوک کے قریب سلیکشن گریڈ کانسٹیبل نصر اللہ نے ایک گاڑی زیر نمبر JK01-8038 کو رکُنے کے لیے کہا لیکن ڈرائیور نصر اللہ کو چونکا کر وہاں سے فرار ہو گیا۔ اس کے بعد پڈگام پورہ کے مقام پر میں دوبارہ سے اسے روکنے کی کوشش کی گئی لیکن پھر بھی نہیں رُکا، جس کے بعد سی آرپی ایف کی 130 بٹالین کی ناکہ پارٹی نے پہلے وارننگ دیتے ہوئے ہوا میں فائرنگ کی لیکن ڈرائیور گاڑی روکنے میں کوئی توجہ نہیں دی۔

پولیس نے کہا کہ ڈرائیور کی جانب سے کی گئی اس حرکت کی وجہ سے سی آر پی ایف پارٹی نے گاڑی پر فائر کی، جس کے نتیجے میں اس کا ٹائر پھٹ گیا۔ ایک خاتون جیسی پرویز شیخ زخمی ہو گئی۔ ان کے دائیں بازو میں گولی لگی۔ خاتون کا تعلق پلوامہ کے مرن علاقے سے ہے۔

پولیس نے بتایا کہ ڈرائیور جس کی شناخت ہندواڑہ کے جنید طارق ڈار کے بطور ہوئی ہے، کو گرفتار کر کے گاڑی ضبظ کر لیا ہے۔

پولیس کے مطابق زخمی خاتون کو پہلے پولیس کے ذریعہ سب سے پہلے ایس ڈی ایچ اونتی پورہ منتقل کیا گیا اور جہاں سے اسے مزید علاج کے لیے بونز اور جوائنٹس ہسپتال سرینگر منتقل کیا گیا۔ ڈاکٹروں نے ان کی حالت مستحکم بتائی گئی ہے۔ زخمی پولیس ایس جی سی ٹی بھی مستحکم ہے۔

پولیس نے اس ضمن میں ایف آئی آر درج کر کے مزید تحقیقات شروع کر دی ہے