ترال(پلوامہ):وادی کے دیگر اضلاع کی طرح گرو نانک دیو جی کا یوم پیدائش ( گور پورب ) ترال میں سکھ برادری کے افراد نے مذہبی جوش و جذبے کے ساتھ منایا۔اس حوالے سے سیموہ، چھترگام، مونگہامہ، بیگنڈ، کنگلورہ، ہفو نگین پورہ اور دیگر دیہات کے گردواروں میں خصوصی پوجا پاٹ کی گئی اور جہاں سرد موسم کے باوجود مرد، خواتین اور بچوں سمیت سکھ سنگھت کے لوگوں کی بڑی تعداد نے شرکت کی۔
اس موقع پر جموں و کشمیر اور پورے ملک کی سلامتی، استحکام اور خوشحالی کے لیے خصوصی دعائیں کی گئیں۔انتظامیہ نے اس حوالے سے معقول انتظامات کئے تھے۔ وہیں مسلم برادری نے سکھ سنگھت کو گلے لگاکر بھائی چارے کی قندیل کو زندہ رکھا۔
دریں اثناء کلچرل اکیڈمی کی جانب سے پرکاش پورب کے موقع پر سیموہ ترال میں قوی سمیلن کا اہتمام کیا گیا جس میں اکیڈمی کے شیراز میگزین کے ایڈیٹر پوپندر سنگھ پارس نے پنجابی زبان کو فروغ دینے کے حوالے سے اکادمی کی حصولیابیوں کو بیان کیا، جبکہ اس موقع پر کئی بچیوں نے کلام پیش کر کے داد تحسین حاصل کی۔