اونتی پورہ پولیس نے خشخاش کی فصل کو تباہ کیا

منشیات کے خلاف مہم جاری رکھتے ہوئے اونتی پورہ پولیس نے ایکسائز محکمہ اور تحصیل انتظامیہ کے باہمی اشتراک سے مختلف دیہات میں خشخاش کی فصل کو تباہ کیا۔

جنوبی کشمیر کے اونتی پورہ علاقے میں پولیس، محکمہ ایکسائز اور تحصیل انتظامیہ کی جانب سے منشیات کے خلاف کارروائی تیز کی جا رہی ہے۔ اس ضمن میں اونتی پورہ کے مختلف علاقوں میں کئی کنال اراضی پر کی جا رہی خشخاش کی فصل کو تباہ کیا گیا۔

تحصیلدار اونتی پورہ نے تفصیلات فراہم کرتے ہوئے کہا کہ مہم کے تحت اونتی پورہ کے نئی بگ سمیت مختلف دیہات میں کئی کنال اراضی پر کی جا رہی خشخاش کی فصل کو تباہ کیا گیا۔ انہوں نے کہا کہ اس طرح کی کارروائی مستقبل میں بھی جاری رکھی جائے گی۔

تحصیلدار نے مزید بتایا کہ 'منشیات کی وبا کو ختم کرنے کے لیے انتظامیہ ہر وقت تیار ہے اور اس بدعت کا قلع قمع کرنے کے لیے عوامی تعاون از حد ضروری ہے کیونکہ یہ بدعت ایک ناسور کی شکل اختیار کر گیا ہے اور عوام کو چاہیے کہ از خود اس بدعت کے خلاف سینہ سپر ہو جائیں۔'

پولیس اور انتظامیہ کی جانب سے کی گئی کارروائی کی ستائش کرتے ہوئے لوگوں نے کہا ہے کہ 'منشیات کی بدعت پر قابو پانے کے لیے ایسے اقدامات وقت کی اہم ضرورت ہے۔'