Pampore Swachhta Programme: سوچھتا مہم کے تحت لالپورہ جھیل کی صفائی

سوچھتا ہی سیوا مہم کے تحت پانپور میں منعقدہ تقریب کے دوران شرکاء نے ماحول کو صاف رکھنے اور منشیات سے دور رہنے کا عہد لیا۔

پلوامہ (جموں کشمیر) :صفائی ستھرائی اور ماحولیاتی ذمہ داری کے تئیں کمیونٹی کی وابستگی اور ’’سوچھتا ہی سیوا‘‘ مہم کے تحت جنوبی کشمیر کے پلوامہ ضلع میں لالپورہ، پانپور جھیل کے گرد صفائی انجام دی گئی۔ صفائی مہم میں کمشنر سیکریٹری دیہی ترقی، مندیپ کور، پلوامہ کے ڈپٹی کمشنر ڈاکٹر بشارت قیوم، ضلع ترقیاتی کونسل کے چیئرپرسن، سینئر سپرنٹنڈنٹ آف پولیس اونتی پورہ کے علاوہ پی آر آئی ممبران، ضلع کے سینئر افسران مقامی اسکولی طلبہ اور معزز شہریوں نے شرکت کی۔

پروگرام کے آغاز میں شرکاء نے سوچھتا مہم کو کامیاب بنانے اور آس پاس کے ماحول کو صاف ستھرا رکھنے کا کا عہد کی۔ شرکاء نے اپنے اردگرد کے ماحول کی صفائی کو برقرار رکھنے کے علاوہ لوگوں کو بھی صفائی ستھرائی پر آمادہ کرنے کا عزم کیا۔ اس موقع پر شرکاء خاص کر طلبہ نے نشہ سے دور رہنے اور منشیات مخالف مہم میں بھی بڑھ چڑھ کر شرکت کرنے کے عزم کا اعادہ کیا۔

اس موقع پر عہدیداروں سمیت شرکاء نے لالپورہ جھیل کے کناروں اور آس پاس کی رابطہ سڑکوں پر صفائی انجام دی۔ کمشنر سیکریٹری برائے دیہی ترقی نے اس موقع پر منعقدہ تقریب کے دوران کہا کہ ’’صفائی کو یقینی بنانے اور ماحول کو صاف رکھنے سے ہی ایک تندرست معاشرے کی تعمیر ممکن ہو سکتی ہے۔‘‘ انہوں نے اس بات پر زور دیا کہ سوچھتا مہم کوئی پروگرام یا تقریب نہیں کہ جو مقررہ وقت کے بعد ختم ہو جاتی ہے بلکہ صفائی ہر روز اور ہر وقت انجام دینے سے ہی ہمارا معاشرہ صاف و پاک رہ سکتا ہے۔