جنوبی کشمیر کے قصبہ پانپور میں بدھ کو بلاک دیوس پروگرام منعقد کیا گیا جس میں ضلع ترقیاتی کمشنر پلوامہ ڈاکٹر راگھو لنگر نے پانپور کے مختلف علاقوں سے آئے ہوئے لوگوں کے مسائل سنے اور انہیں یقین دلایا کہ عوام کے مسائل کو ترجیحی بنیادوں پر حل کیا جائے گا۔
ڈی سی پلوامہ نے کی بلاک دیوس میں شرکت پروگرام کے دوران وفود نے ضلع ترقیاتی کمشنر کو پانی، بجلی اور سڑکوں کے علاوہ اپنے علاقہ جات میں درپیش دیگر مشکلات سے بھی آگاہ کیا۔ جس پر ڈی سی پلوامہ نے اپنے ہمراہ افسران کو ترجیحاتی بنیادوں پر عوامی مسائل حل کرنے کی تلقین کی۔
بلاک دیوس کی تقریب کی اہمیت کے حوالے سے ضلع ترقیاتی کمشنر پلوامہ نے کہا کہ ایسے پروگرام منعقد کرنے سے لوگوں کی مختلف محکمہ جات کے افسران تک رسائی آسانی سے ممکن ہو جاتی ہے جس سے لوگ اپنے علاقوں کے شکایات انتظامیہ تک پہنچا سکتے ہیں۔ انہوں نے کہا کہ ایسے پروگرامز کی وجہ سے عوام کو کافی فائدہ پہنچا ہے۔
مزید پڑھیں؛ سری نگرمیں مسافر طیارہ برف سے ٹکرایا
پروگرام میں ضلع ترقیاتی کمشنر پلوامہ ڈاکٹر راگھو لنگر کے علاوہ، اے ڈی سی اونتی پورہ ظفر حسین شال، ایکزن پی ڈی ڈی اور تحصیلدار پانپور کے علاوہ دیگر کئی محکموں کے افسران بھی موجود تھے۔
