اگلی حکومت یہاں بی جے پی ہی بنائے گی: بی جے پی ترجمان

بی جے پی جموں و کشمیر کے ترجمان الطاف ٹھاکر نے پھر ایک بار جموں و کشمیر میں اپنے دم پر حکومت قائم کرنے کا دعویٰ کیا ہے تاہم مرکزی سرکار جموں و کشمیر میں اسمبلی انتخابات منعقد کرنے کے موڑ میں نہیں لگتی۔

پلوامہ (جموں کشمیر) :’’بھارتیہ جنتا پارٹی (بی جے پی) آنے والے اسمبلی انتخابات میں پچاس پار کا نعرہ (یعنی اسمبلی انتخابات میں پچاس سیٹیں) حقیقت میں تبدیل کرکے اسمبلی میں اپنے بل بوتے پر حکومت قائم کرے گی۔‘‘ بی جے پی کے ریاستی ترجمان الطاف ٹھاکر نے ان باتوں کا اظہار ترال علاقے میں بی جے پی وررکز کنونشن کے دوران کیا۔

میڈیا ورکرز سے خطاب کے حاشیہ پر میڈیا نمائندوں کے ساتھ گفتگو کے دوران کہا کہ بی جے پی دور میں جموں وکشمیر کے اندر امن و امان بحال ہوا ہے جبکہ عسکری سرگرمیوں میں بھی کمی آئی ہے اور ہڑتالی سیاست کے دور کا خاتمہ ہو چکا ہے۔ الطاف ٹھاکر نے دعویٰ کیا کہ ’’بھارتیہ جنتاپارٹی ہمیشہ الیکشن کے لیے تیار ہے اور پچاس پار کا جو نعرہ پارٹی نے لگایا ہے وہ ہم زمینی سطح پر سچ ثابت کر دکھائیں گے۔‘‘

این سی، پی ڈی پی اور کانگریس کی راست تنقید کرتے ہوئے ٹھاکر نے کہا کہ یہ سبھی سیاسی جماعتیں بوکھلائی ہوئی ہیں۔ ٹھاکر نے کہا: ’’اپوزیشن جماعتیں مودی کے نام سے ہی خوفزدہ ہیں، اور اسی لیے وہ الیکشن سے قبل ایک دوسرے کے ساتھ گٹھ جوڈ کر رہیں ہیں، کیونکہ ان کو معلوم ہے کہ وہ بھاجپا کا مقابلہ نہیں کر سکتی اسی لیے بوکھلاہٹ میں بے سر پیر کی باتیں پھیلا رہے ہیں۔‘‘