پونچھ: پیٹرولیم مصنوعات کی بڑھتی قیمتوں کے خلاف احتجاج

پیٹرولیم مصنوعات کی قیمت میں ہو رہے اضافے کے خلاف ضلع پونچھ میں احتجاج کیا گيا۔ مظاہرین نے مہنگائی کے لیے مرکز کو ذمہ دار ٹھہراتے ہوئے حکومت کا مجسمہ نذر آتش کیا۔

پیر کے روز پونچھ یوا سنگھ کی جانب سے ڈاکٹر سکھویندر سنگھ اور پینتھرس پارٹی کے رہنما کلدیپ راج کی زیر صدارت نوجوانوں نے پٹرول، ڈیزل کی بڑھتی قیمتوں کے خلاف احتجاج کیا۔ اس موقع پر مظاہرین نے مرکزی حکومت کا مجسمہ نذر آتش کیا۔

نوجوانوں نے مرکز میں برسر اقتدار بی جے پی پر الزام عائد کیا کہ وہ مہنگائی پر لگام لگانے میں ناکام ہے۔ انہوں نے کہا کہ جب بی جے پی اقتدار سے باہر تھی تو غریبوں سے خوب وعدے کرتی تھی لیکن اقتدار میں آنے کے بعد اپنے وعدے بھول کر اقتدار کے نشے میں چور ہے۔

نوجوانوں نے کہا کہ بین الاقوامی بازار میں پیٹرول کی قیمت کم ہونے کے باوجود بھارت میں تیل کی قیمت میں اضافہ ہو رہا ہے۔ بڑھتی قیمت سے عوام پریشان ہیں۔ اگر ایسے ہر چیز کی قیمت میں اضافہ ہوتا رہا تو عوام کا جینا مشکل ہو جائے گا۔ مرکزی حکومت کو مہنگائی پر قابو کرنا چاہیے تاکہ عام آدمی سانس لے سکے۔