سڑک کی تعمیر کے دوران ہوئے نقصان کا معاوضہ فراہم کیے جانے کی اپیل

ضلع پونچھ کی تحصیل منڈی میں بیدار پنچایت سے چھمبر کناری تک نئی سڑک کی تعمیر سے لوگ نا خوش ہیں، لوگوں کے کہنا ہے کہ کھیتوں اور درختوں کے علاوہ نئی سڑک کی زد میں انکے مکانات بھی آ رہے ہیں۔

سڑک کی تعمیر اور کشادگی کا مطالبہ کرتے ہوئے جموں و کشمیر کے دور دراز علاقوں میں آئے روز احتجاج ہوتے رہتے ہیں، تاہم بعض مقامات پر سڑک کی تعمیر یا کشادگی کے دوران لوگوں کو بعض دفعہ نقصانات سے بھی دوچار ہونا پڑتا ہے۔

ضلع پونچھ میں تحصیل ہیڈ کوارٹر منڈی سے قریب سات کلومیٹر دور بیدار پنچایت سے چھمبر کناری میں سڑک کی تعمیر کی زد میں آنے والی زمین کے مالکان نے سخت تشویش کا اظہار کیا ہے۔

مقامی لوگوں نے الزام عائد کرتے ہوئے کہ سڑک کو اصل منظور شدہ علاقے کے بجائے رہائشی علاقوں میں تعمیر کیا جا رہا ہے جو انکے ساتھ سراسر نا انصافی ہے۔

انہوں نے کہا کہ ’’سڑک کی تعمیر کے دوران نہ صرف درختوں کی بے دریغ کٹائی کی گئی بلکہ ہمارے مکانات کو بھی شدید نقصان پہنچا ہے۔‘‘

انہوں نے کہا کہ سڑک کی زد میں کھیت اور درخت آنے سے انکا روزگار بھی متاثر ہو گیا ہے جس کے لیے انہیں معاوضہ فراہم نہیں کیا جا رہا ہے۔

متاثرہ افراد نے سڑک کو اصل مقام پر تعمیر کیے جانے کا مطالبہ کیا ہے۔

اس ضمن میں مقامی سرپنچ کا کہنا تھا کہ ’’سڑک کہاں اور کس مقام پر تعمیر کی جائے گی اس کے لیے متعلقہ محکمہ جواب دہ ہے، تاہم سڑک کی تعمیر و کشادگی کے دوران متاثر ہوئے افراد کو فوری طور معاوضہ فراہم کیا جانا چاہئے۔‘‘