پونچھ: محکمہ صحت کی جانب سے کورونا ویکسینیشن کے لیے تشہیری مہم

ضلع پونچھ میں 45 برس سے زائد عمر کے افراد کو کورونا ویکسنیشن کے لیے رجسٹریشن کی غرض سے محکمہ صحت نے تشہیری مہم کا آغاز کیا۔

عالمی وبا کورونا وائرس کے بڑھتے مثبت معاملات کے پیش نظر ضلع پونچھ میں لوگوں کو احتیاطی تدابیر پر عمل کرنے کے علاوہ کورونا ویکسین لگانے کی تلقین کی جا رہی ہے۔

سرحدی ضلع پونچھ کے تحصیل منڈی میں محکمہ صحت کی جانب سے تشہیری مہم چلائی جا رہی ہے، جس میں لوگوں سے رہنما خطوط کی پاسداری عمل میں لانے کی تلقین کی جا رہی ہے۔ وہیں محکمہ صحت کی جانب سے 45برس سے زائد عمر کے افراد کے لیے کورونا ویکسین لگانے کے لیے سامنے آنے کی تلقین کی جا رہی ہے۔

اس حوالے سے بلاک میڈیکل آفیسر منڈی نے بتایا کہ گزشتہ برس ملک کے بڑے شہروں میں کورونا مثبت کیسز میں اضافے کے بعد وادی سمیت ضلع پونچھ میں بھی مثبت معاملات میں اضافہ دیکھا گیا تھا۔ انہوں نے کہا کہ اگر لوگ رہنما خطوط کی پاسداری عمل میں نہیں لائیں گے تو پھر سے کورونا کیسز میں اضافہ دیکھنے کو ملے گا۔

ویکسینین کے بارے میں تفصیلات فراہم کرتے ہوئے انہوں نے کہا کہ ضلع میں 45 برس سے زیادہ عمر کے افراد کے لیے ویکسینیشن اور اور ٹیسٹ کو یقینی بنائے جانے کی غرض سے ضلع میں تشہیری مہم چلائی جا رہی ہے۔