پاکستانی حکام نے پونچھ کے لاپتہ نوجوان کو بھارتی حکام کے حوالے کیا

قریب نصف سال قبل لاپتہ ہوئے جموں کشمیر کے ضلع پونچھ کے جولاس گاؤں سے تعلق رکھنے والے ایک نوجوان کو جمعہ کے روز پاکستانی حکام نے بھارتی حکام کے سپرد کیا۔

یاد رہے کہ جولاس گاؤں لائن آف کنٹرول پر واقع ہے اور الیاس احمد 11 دسمبر 2018 کو لاپتہ ہوگیا تھا جس کے بعد اس کے اہل خانہ نے مقامی پولیس اسٹیشن میں رپورٹ درج کرائی تھی۔

ایک سرکاری عہدیدار نے نوجوان کی شناخت32 سالہ الیاس احمد ولد میر محمد ساکن جولاس پونچھ کے بطور کرتے ہوئے کہا 'جمعہ کی صبح پاکستانی حکام نے کراسنگ پوائنٹ پر نوجوان کو بھارتی حکام کے حوالے کیا جہاں سے اس کو پونچھ پولیس کے سپرد کیا گیا'۔

انہوں نے بتایا کہ لڑکے کو قانونی اور طبی لوازمات کی ادائیگی کے بعد لواحقین کے حوالے کیا جائے گا۔

قابل ذکر ہے کہ الیاس احمد کے لاپتہ ہونے کے چند روز بعد ایک ویڈیو وائرل ہوا تھا جس میں اس کو پونچھ کے مقابل پاکستان کے ایک گاؤں میں دیکھا گیا تھا جس کے بعد الیاس کی والدہ نے پاکستانی حکام سے اس کی رہائی کی اپیل کی تھی۔