فورسز کی مشترکہ پارٹی نے صوبہ جموں کے مینڈھر پونچھ علاقے میں عسکریت پسندوں کی کمین گاہ کا سراغ لگاتے ہوئے یہاں سے بھاری مقدار میں اسلحہ و بارود ضبط کیا ہے۔
پولیس ذرائع کے بقول کارروائی کے دوران دو افراد کو بھی حراست میں لیا گیاہے۔
اطلاعات کے مطابق پونچھ کے مینڈھر علاقے میں مینڈھر پولیس، فوج اور ایس او جی جموں کی مشترکہ ٹٰیم نے مصدقہ اطلاع موصول ہونے کے بعد علاقے سے عسکریت پسندوں کی کمین گاہ کا پتہ لگاتے ہوئے یہاں سے بھاری مقدار میں اسلحہ و گولہ بارود ضبط کیا ہے۔
پولیس ذرائع کے بقول کارروائی کے دوران ایسے بارود مواد کو ضبط کیا گیا ہے جس کو غٰیر قانونی کارروائیوں میں استعمال کرنے کا مقصد تھا۔
پولیس ذرائع کے بقول بارودی مواد کو سرحدی علاقے سے شہری علاقوں تک لے جانا مقصود تھا تاہم فورسز کی بروقت کارروائی سے ایک بڑے منصوبے کو ٹالا گیا۔
انہوں نے بتایا کہ کارروائی کے دوران 2افراد کو گرفتار کرلیا گیا جن کی تحویل سے چینی ساخت کے 2 پستول، 6میگزین، 70 عدد پستول راونڈس، 11 عدد ہتھ گولے، 1 وائرلیس سیٹ، 1 آئی ای ڈی، 2 عدد بیٹری، 2 جھنڈے، 1موبائل فون، 1 چارجر، 1 پن ڈرائیو کے علاوہ دیگر ناقابل اعتراض مواد ضبط کیا گیا۔
اس سلسلے میں پولیس نے پولیس تھانہ مینڈھر میں ایف آئی آر زیر نمبر 217/2020 متعلقہ قانونی دفعات کے تحت درج کرتے ہوئے مزید تحقیقات کا سلسلہ تیز کردیا ہے۔ پولیس کے بقول گرفتار کئے گئے افراد سے مزید پوچھ تاچھ جاری ہے۔
