سرحدی ضلع پونچھ کی تحصیل منڈی کے مختلف مقامات پر یوم آزادی کے تعلق سے تقاریب کا اہتمام کیا گیا جہاں پنچوں، سرپنچوں نے بھی ترنگا لہرایا۔
ملک بھر کے ساتھ ساتھ جموں و کشمیر میں بھی یوم آزادی کے موقع پر تقاریب کا اہتمام کیا گیا۔
تحصیل منڈی میں بھی مختلف پنچایتوں کے ساتھ ساتھ بلاک ہیڈ کواٹرز پر کورونا وائرس کے پیش نظر احتیاطی تدابیر کو ملحوظ رکھتے ہوئے تقاریب کا اہتمام کیا گیا۔
تحصیل میں سب سے بڑی تقریب بوائیز ہائیر سیکنڈری اسکول منڈی میں منعقد ہوئی جہاں بلاک ڈولپمنٹ چیرمین شمیم احمد گنائی نے ترنگا لہرایا اور پریڈ پر سلامی لی۔ جس کے بعد انہوں نے عوام سے خطاب کیا۔
انہوں نے کہا کہ ’’ہمیں آزادی یوں ہی نہیں اس ملک کی آزادی میں ہمارے رہنماؤں نے ہمارے نوجوانوں اور خواتین نے اپنی جانوں کے نذرانے دئے ہیں، تب جاکر یہ آزادی حاصل ہوئی ہے۔‘‘
اس کے علاوہ سنٹرل ریزرو پولیس فورس کی 239A بٹالین کی جانب سے بھی پرچم کشائی کی گئی اور آفیسر کمانڈینگ انسپکٹر حیدر امام نے ترنگا لہرایا۔
اسی طرح منڈی کے ڑائی گاوں کی پنچائیت اڑائی ملکاں میں صبح سویرے سرپنچ محمد اسلم ملک نے ترنگا لہرایا۔