’امفان‘ طوفان میں مزید شدت کی پیشن گوئی

جنوبی مشرقی خلیج بنگال میں ہوا کے دباؤ میں کمی شدت اختیار کر چکی ہے اور یہ ایک طوفان میں تبدیل ہوگیا ہے جسے ’امفان‘ کا نام دیا گیا ہے۔

محکمہ موسیات کے مطابق امفان طوفان بارہ گھنٹے کے اندر مشرقی ساحل سے ٹکرائے گا۔ طوفان کی شدت کو دیکھتے ہوئے بھارتی بحریہ کو چوکس کردیا گیا۔

طوفان کے خطرہ کے پیش نظر وشاکھاپٹنم میں بحریہ کے جہازوں کو بھی تیار رکھا گیا ہے جبکہ تقریباً بیس ریسکیو ٹیموں کو بھی مغربی بنگال اور اڑیسہ میں تیار رکھا گیا ہے۔ خدشہ ظاہر کیا جارہا ہے کہ مغربی بنگال اور اڈیسہ میں طوفان کا سب سے زیادہ اثر ہوسکتا ہے۔

اس کے علاوہ تمل ناڈو اور آندھراپردیش میں بھی امفان طوفان کے چلتے چوکسی اختیار کی جارہی ہے۔

محکمہ موسمیات کی جانب سے ماہی گیروں کو وارننگ دی گئی ہے کہ وہ 16 تا 20 مئی کے دوران خلیج بنگال میں مچھلیاں پکڑنے کےلیے نہ جائیں۔

پیش قیاسی میں مزید بتایا گیا ہے کہ جنوبی مغربی بنگال کے علاقہ میں 90 تا 100 کیلومیٹر فی گھنٹہ کی رفتار سے ہوائیں چلیں گی۔