سدگورو کووڈ اسپتال میں آتشزدگی، تمام مریض محفوظ

اڈیشہ کے شہر کٹک کے بیرونی علاقے جگت پور کے سدگورو کووڈ ہسپتال میں آتشزدگی کا معاملہ سامنے آیا ہے۔ لیکن راحت کی بات یہ ہے کہ یہاں داخل 130 مریضوں کو ہسپتال سے بحفاظت باہر نکال لیا گیا ہے۔

ریاست اڈیشہ میں کٹک شہر کے بیرونی علاقے جگت پور کے سدگورو کووڈ ہسپتال کے آئی سی یو میں ہفتے کے روز اچانک آگ لگ گئی۔ لیکن راحت کی بات یہ رہی کہ یہاں داخل 130 مریضوں کو بحفاظت باہر نکال لیا گیا ہے اور انہیں دوسرے کووڈ اسپتالوں میں منتقل کر دیا گیا۔

ذرائع نے بتایا کہ ہسپتال کے آئی سی یو میں شارٹ سرکٹ کے باعث آگ لگ گئی۔ فائر بریگیڈ نے فوری طور پر کارروائی شروع کی اور صورتحال پر قابو پالیا گیا۔ اس طرح سے کووڈ کے تمام 130 مریضوں کو بچالیا گیا۔

ہسپتال ذرائع نے بتایا کہ آئی سی یو میں داخل تمام 24 مریضوں اور آکسیجن کی سپورٹ والے 22 مریضوں کو فوری طور پر کٹک اور بھونیشور کے دوسرے کووڈ ہسپتالوں میں منتقل کردیا گیا۔ تاہم ہسپتال کی ڈاکٹر سنگیتا موہنتی نے ہسپتال میں آتشزدگی سے انکار کیا ہے۔

انہوں نے کہا کہ ایک آئی سی یو کے ایک ایٹنڈنٹ نے ایک ائیرکنڈیشنر سے دھواں نکلتے دیکھا اور جلد ہی آئی سی یو دھواں سے بھر گیا۔ اس کے بعد آئی سی یو اور دیگر وارڈوں سے مریضوں کو منتقل کرنے کے لیے راحت و بچاؤ مہم شروع کی گئی۔

اسپتال کے عملے کا کہنا تھا کہ آئی سی یو سے دھواں باہر نکالنے کے لیے اس کے تمام شیشے کھولے دیے گئے اور تمام مریضوں کو آسانی سے منتقل کر دیا گیا تھا۔

ضلع کٹک کے کلکٹر، کٹک میونسپل کارپوریشن کے کمشنر اور پولیس کمشنر فوری طور پر راحتی کاموں کے لیے موقع پر پہنچ گئے۔

اتھارٹی نے فوری کارروائی کرتے ہوئے تقریباَ 30 ایمبولینسوں اور بسوں کو موقع پر بھجا تاکہ کووڈ مریضوں کو نزدیکی دیگر ہسپتالوں میں منتقل کیا جاسکے۔ انتظامیہ نے جانچ کے احکامات جاری کیے ہیں۔