ممبرا میں خواتین کا احتجاج

مہاراشٹر کے مسلم اکثریتی شہر ممبرا میں شہریت ترمیمی قانون، این پی آر اور این آرسی کے خلاف ممبرا کوسہ مہیلا ایسوسی ایشن کے زیر اہتمام 26 جنوری کے موقع پر ہزاروں تعداد میں خواتین نے سنویدھان بچاو ریلی نکالی۔

یوم جمہوریہ کے موقع پر مسلم اکثریتی شہر ممبرا کی خواتین شہریت ترمیمی قانون کو واپس لینے کا مطالبہ کرتے ہوئے زبردست پرامن احتجاج کیا۔

اس ریلی میں کثیر تعداد میں ہندو، مسلم، سکھ اور دوسرے مذاہب کی خواتین شامل تھیں۔

خواتین نے اس قانون کے خلاف نعرے بازی کرتے ہوئے تانا شاہی نہیں چلے گی، ہٹلر شاہی نہیں چلے گی، سی اے اے واپس لو این آر سی نہیں چلے گی جیسے نعرے بلند کرتے ہوئے متنازع قانون کی مخالفت کی۔

اس مظاہرے میں شامل خواتین نے کہاکہ جب تک پارلیمنٹ سے اس سیاہ قانون کو واپس نہیں لیا جاتا تب تک اس کی مخالفت میں احتجاجی مظاہرے جاری رہیں گے۔

وہیں دوسری جانب بھیونڈی میں بھی رات تقریباً 9 بجے سنویدھان بچاو سنگھرش سمیتی نے بھیونڈی میں شاہین باغ کی طرز پر احتجاجی مظاہرہ کی حکمت عملی کو لیکر ایک ہنگامی میٹنگ کی جس میں کثیر تعداد میں سیاسی رہنماؤں سمیت مقامی شہری شامل تھے۔ اس بات کی امید ظاہر کی جارہی ہے ایک دو روز میں بھیونڈی میں شاہین باغ کی طرز پر خواتین کے احتجاج کا سلسلہ شروع کیا جائے گا۔