ممبئی : بھوت بھگانے کے نام پر ماں بیٹے کا قتل

ریاست مہاراشٹر کے کلیان میں بھوت بھگانے کے نام پر ماں بیٹے کو پیٹ پیٹ کر ہلاک کرنے کا انتہائی سنسنی خیز معاملہ سامنے آیا ہے۔ کلیان پولیس نے تانترک سمیت چار افراد کو گرفتار کر لیا ہے۔

ریاست مہاراشٹر کے کلیان مغرب کے اٹالی علاقہ میں جسم سے بھوت باہر نکالنے کے نام پر معمر ماں اور بیٹے کا انتہائی بے رحمی سے پیٹ پیٹ کر قتل کردیا گیا۔ کھڑک پاڑہ پولیس نے تانترک سمیت چار ملزمین کو گرفتار کیا ہے۔ گرفتار ملزمین میں مہلوک شخص کا نابالغ بیٹا بھی شامل ہے۔

کلیان کھڑک پاڑہ پولیس تھانہ کے ذرائع سے موصولہ اطلاعات کے مطابق شہر کے اٹالی علاقہ میں رہائش پذیر پنڈ ھری ناتھ تَرے 50 اوران کی بھتیجی کویتا تَرے کے جسم میں’ دیوی شکتی‘ کا شبہ ہو نے پر اہل خانہ نے دونوں کو اسی علاقہ میں رہنے والے ایک نام نہاد تانترک سریندر پاٹل کے پاس لے گئے۔ تانترک نے اہل خانہ کو بتایا کہ پنڈھری ناتھ اور اس کی ماں چندو بائی ترے 79 کے جسم میں بھوت ہے جو مختلف جادو ٹونا اور جھاڑ پھونک کے بعد ہی نکلے گا۔

چندو بائی اور پنڈ ھری ناتھ کے جسم پر پہلے خوب دیر تک ہلدی لگائی گئی بعد ازاں گھر کے افراد جس میں پنڈھری ناتھ ترے کا نابالغ بیٹا بھی شامل تھا اس نے ڈنڈوں سے ماں بیٹے کی زبردست پٹائی شروع کردی۔ بھوت بھگانے کے نام پر تقریباً دو گھنٹے تک پنڈھری ناتھ اور چندو بائی کو بے تحاشہ پیٹا گیا جس کے باعث دونوں کی موت ہوگئی۔

اس معاملے میں کھڑک پاڑہ پولیس اسٹیشن میں تانترک سریندر پاٹل 35، ونائک کیلاش 22 کوتیا کیلاش 27 اور مہلوک کے ایک نابالغ بیٹے کے خلاف آئی پی سی 302، 34 اور توہم پر ستی ایکٹ 2013 کی دفعہ تین کے تحت مقدمہ ل درج کر سبھی کو گرفتار کر لیا گیا ہے۔