نئی دہلی: ملک بھر میں 28 دسمبر یعنی آج کانگریس کا یوم تاسیس منایا جارہا ہے۔ دہلی میں واقع کانگریس کے ہیڈ کوارٹر میں پارٹی صدر ملیکارجن کھرگے نے پارٹی کا پرچم لہرایا۔ اس موقع پر کانگریس لیڈر راہل گاندھی سمیت کئی سینئر لیڈر موجود رہے۔
اس خاص موقع پر کانگریس ناگپور میں ایک میگا ریلی "ہیں تیار ہم " کا انعقاد کرنے جا رہی ہے۔ ناگپور میں آج منعقدہ ریلی کی تیاریاں مکمل کر لی گئی ہیں۔ یہاں کانگریس لوک سبھا انتخابات 2024 سے قبل اپنی طاقت کا مظاہرہ کرے گی۔ ریلی میں پارٹی کے سابق سربراہان سونیا گاندھی اور راہل گاندھی بھی خطاب کر سکتے ہیں۔ کانگریس کی پوری ورکنگ کمیٹی، کئی ریاستی یونٹ کے سربراہان اور سی ایل پی قائدین اس ریلی میں شرکت کریں گے، جہاں پارٹی کے سربراہ ملیکارجن کھرگے مودی حکومت کی ناکامیوں کو بیان کریں گے اور کانگریس کو بی جے پی کے قومی متبادل کے طور پر پیش کریں گے۔ مہاراشٹر میں ناگپور کو یوم تاسیس کی ریلی کے لیے چنا گیا کیونکہ یہ ودربھ خطے کا مرکز ہے، جس نے روایتی طور پر کانگریس کی حمایت کی ہے۔ ناگپور میں بی جے پی کی نظریاتی تنظیم، آر ایس ایس کا ہیڈکوارٹر بھی ہے۔