بھیونڈی: الگ الگ محکموں کے لیے چیئرمین کا انتخاب آج

مہاراشٹر کے صنعتی شہر بھیونڈی میں آج اسٹینڈنگ کمیٹی کے چیئرمین اور دوسرے محکموں کے لیے چیئرمین کا انتخاب ہوگا۔

ریاست مہاراشٹر کے صنعتی شہر بھیونڈی کے میونسپل کارپوریشن میں آج 11 بجے اسٹینڈنگ کمیٹی کے چیئرمین کا انتخاب میونسپل کارپوریشن کے صدر دفتر میں پریسائڈنگ افسر اور تھانے ضلع مجسٹریٹ راجیش نارویکر کی صدارت میں منعقد ہوگا۔
اس انتخاب میں کانگریس کے باغی کارپوریٹرس اور شیوسینا اہم کردار ادا کر سکتے ہیں۔ میونسپل کارپوریشن کے عوامی رابطہ افسر کے مطابق آج ہی کارپوریشن کی دیگر خصوصی کمیٹیوں کے چیئرمین اور ڈپٹی چیئرمین کا بھی انتخاب عمل میں آئے گا۔

واضح ہوکہ اسٹینڈنگ کمیٹی کا انتخاب پانچ اکتوبر کومنعقد ہونے والا تھا۔ جس کے لیے کانگریس کے گروپ لیڈر محمد حلیم انصاری، عمران ولی محمد خان اور بی جے پی سُمیت پاٹل نے اسٹینڈنگ کمیٹی کے چیئرمین کے لیے پرچہ نامزدگی داخل کیا تھا لیکن اسمبلی انتخابات کے مثالی ضابطہ اخلاق کے سبب انتخابات ملتوی کر دیا گیا تھا۔کارپوریشن کے سکریٹری انل پردھان کے مطابق آج ہونے والا اسٹینڈنگ کمیٹی کے چیئرمین کا انتخاب اسی نامزدگی کے عمل کے تحت ہوگا۔

میونسپل کارپوریشن میں کانگریس کے گروپ لیڈر محمد حلیم انصاری نے کانگریس کی جانب سے وہپ جاری کرتے ہوئے اسٹینڈنگ کمیٹی میں کانگریسی اراکین کو ہدایت دی ہے کہ وہ پارٹی کے اُمیدوار حلیم انصاری کے حق میں ووٹ کریں۔ کانگریس کے اسٹینڈنگ کمیٹی کے تمام آٹھوں ممبران کے نام ذاتی وہپ جاری کرتے ہوئے خبردار کیا ہے کہ پارٹی کے منتخب کردہ امیدوار کے بجائے کسی دوسرے امیدوار کے حق میں ووٹ ڈالنے اور غیر جانبدار رہنے والے ممبران کے خلاف تادیبی کاروائی کی جائے گی۔

معلوم ہو کہ 16 رکنی اسٹینڈنگ کمیٹی میں کانگریس کے آٹھ، بی جے پی کے چار، کونارک وکاس اگھاڑی کے دو اور شیوسینا کے دو رکن ہیں۔ اسٹینڈنگ کمیٹی میں کانگریس کے آٹھ میں سے تین اراکین کا نام باغی کارپوریٹروں کی فہرست میں شامل ہے۔