پٹرول اور سی این جی میں اضافے پر شیوسینا کی مودی حکومت پر تنقید

شیوسینا نے کہا کہ 'کورونا جیسے بحران میں آٹے، نمک، چائے، چینی، سبزی، تیل، پیٹرول، ڈیزل اور ایل پی جی کی قیمتیں آسمان چھورہی ہیں۔

شیوسینا نے مرکزی حکومت پر تنقید کرتے ہوئے کہا ہے کہ 'پٹرول، ڈیزل کی قیمتوں میں مسلسل اضافہ ہورہا ہے۔ ایسی صورتحال میں عام شہری سستے سی این جی پر چل رہا تھا لیکن مرکزی حکومت نے سی این جی کی قیمتوں میں بھی اضافہ کردیا ہے، ایسی صورتحال میں غریب عوام اگر زندہ رہیں تو کیسے رہیں؟'

شیو سینا نے کہا کہ 'پٹرول وڈیزل کی قیمت کے ساتھ ساتھ ایل پی جی کی قیمت میں بھی اضافہ ہورہا ہے اور سی این جی بھی آج سے 2.58 روپے فی کلو مہنگا ہوگیا ہے۔ قیمتوں میں اس اضافے کے بعد ایک کلو سی این جی کی قیمت 52 روپے فی کلو ہوگئی ہے۔

سی این جی کی قیمتوں میں یہ اضافہ عام لوگوں کے لئے ایک بہت بڑا دھچکا ہے۔ سی این جی کے ساتھ ساتھ گھریلو پائپ لائن گیس کی قیمت میں بھی 55 پیسے فی یونٹ کا اضافہ کیا گیا ہے۔

شیوسینا نے کہا کہ 'کورونا جیسے بحران میں آٹے، نمک، چائے، چینی، سبزی، تیل، پٹرول، ڈیزل اور ایل پی جی کی قیمتیں آسمان چھو رہی ہیں۔

شیو سینا نے تنقید کرتے ہوئے کہا کہ 'اقتدار میں آنے کے لئے انتخابی مہم میں استعمال ہونے والے نعرے 'بہت ہوگئی مہنگائی کی مار۔۔۔' کی ٹیگ لائن اب کہیں نظر نہیں آرہی ہے۔

اس نعرے پر یقین رکھتے ہوئے مہنگائی کے خلاف اہل وطن نے بی جے پی کو دہلی کے تخت پر بٹھایا۔ تاہم برسر اقتدار آنے کے سات سال بعد بھی مرکزی حکومت مہنگائی دور نہیں کر پائی۔ بلکہ مہنگائی دن بدن بڑھتی جارہی ہے۔

ملک میں 71 روپے فی لیٹر ملنے والا پٹرول اب 100 کو عبور کرچکا ہے۔ ڈیزل 55 روپے فی لیٹر ملنے والا اب 100 کے قریب پہنچ گیا ہے۔ ایل پی جی سلینڈر جو 410 روپے میں دستیاب تھا، بی جے پی حکومت میں دوگنا مہنگا ہوگیا ہے۔