عوام نے اقتدار کا نشہ اتار دیا: کانگریس

مہاراشٹر اسمبلی انتخابات کے نتائج کے ذریعے عوام نے برسراقتدار جماعتوں کا نشہ اتار دیا ہے۔ ریاست میں اپوزیشن نظر نہیں آنے کی بات کرنے والے وزیراعلیٰ کو عوام نے مزید طاقت اور حزب اختلاف کا درشن کرادیا ہے۔

مہاراشٹر پردیش کانگریس کمیٹی کے جنرل سکریٹری و ترجمان سچن ساونت نے دادر کے تلک بھون میں میڈیا سے بات چیت کے دوران ان خیالات کا اظہار کیا۔

انہوں نے کہا کہ 'گزشتہ پانچ برسوں سے مسلسل ہر انتخاب میں یکطرفہ فیصلے ہوا کرتے تھے لیکن اسمبلی کا یہ نتیجہ بی جے پی و شیوسینا کی ہٹلر شاہی کے خلاف جدوجہد کرنے کے لیے نیاجوش وجذبہ عطا کرنے والا ہے۔'

انہوں نے کہا کہ 'گزشتہ پانچ برسوں سے حکمراں جماعت جمہوریت مخالف طریقہ اختیار کرتے ہوئے حکومت کر رہی ہے۔ سام، دام، دنڈ اور بھید کا استعمال کرتے ہوئے حزب اختلاف کی آواز کو بندکرنے کی کوشش کی گئی اور حزب اختلاف کو نقصان پہنچانے کے لیے تمام غیراخلاقی طریقوں کا استعمال اس حکومت نے کیا۔'