ممبئی کے شیواجی پارک میدان میں گڑی پاڑوا کے موقع پر ایک جم غفیر سے خطاب کرتے ہوئے ایم این ایس کے سربراہ نے کہا کہ گذشتہ پانچ برسوں سے نریندر مودی صرف جھوٹ بول رہے ہیں چاہے وہ فضائی حملہ ہو یا پھر حکومت کی کوئی پالیسی ہو نیز اچھے دن آنے والے کا نعرہ دینے والے نریندر مودی نے ہر بھارتی شہری کے اکاونٹ میں پندرہ لاکھ روپیہ جمع کیے جانے کے معاملے میں بھی ملک کے عوام کو بے وقوف بنایا۔
ایم این ایس کے سربراہ نے کہا کہ چاہے روزگار کا معاملہ ہو، چاہے میک ان انڈیا کا معاملہ ہو چاہے کوئی اور ملکی یا ریاستی معاملہ ہو مودی نے اپنی لچھے دار تقریروں سے عوام کو بیوقوف بنایا ہے۔
نوٹ بندی کا تذکرہ کرتے ہوئے راج ٹھاکرے نے کہا کہ نوٹ بندی کے سبب سو سے زائد افراد اپنی جان گنوا بیٹھے جبکہ ساڑھے چار کروڑ افراد کو نوکریوں سے ہاتھ دھونا پڑا اور اربوں روپے کا صنعتی نقصان کا ملک کو سامنا کرنا پڑا ۔
عوامی جلسہ میں راج ٹھاکرے نے وزیر اعظم نریندر مودی کا جموں و کشمیر کا ایک ویڈیو بھی دکھلایا جس میں وزیر اعظم کو فوجیوں سے پرتپاک انداز سے ملتے ہوئے دکھلایا گیا ہے اس تعلق سے انہوں نے کہا کہ وزیر اعظم نریندر مودی ایک جانب تو فوجیوں سے انتہائی جذباتی انداز سے ملاقات کرتے ہیں لیکن وہی فوجی جب شدت پسندوں کو نشانہ بناتے ہیں اور پاکستانی فوج کے خلاف کارروائی کرتے ہیں تو ان کے خلاف مقدمات درج کیے جاتے ہیں ۔
انہوں نے مزید کہا کہ مودی حکومت کے پانچ برس کا دور اقتدار صرف ایک پاپ کا گھڑا ثابت ہوا اور ان ایام میں مودی نے کسی بھی اخباری کانفرنس سے خطاب نہیں کیا۔ اس کی وجہ یہ ہے کہ انہیں یہ علم تھا کہ اگر وہ پریس کانفرنس سے خطاب کریں گے تو اخباری نمائندے ان پر ایسے سوالات کی بوچھار کر دیں گے جس کا جواب دینا ان کے لیے ناممکن ہو گا۔
