ونچت اگھاڑی کا بٹن دبانے پر بی جے پی کو ووٹ جانے کا الزام

ریاست مہاراشٹر میں لوک سبھا انتخابات کے دوسرے مرحلے کی پولنگ کے دوران الگ الگ پارلیمانی حلقوں سے ای وی ایم مشینوں میں خرابی ہونے کی شکایات سامنے آ رہی ہیں۔

لیکن اس دوران سولاپور پارلیمانی حلقے سے ونچت بہوجن اگھاڑی اور اے آئی ایم آئی ایم کے مشترکہ امیدوار ڈاکٹر پرکاش امبیڈکر اور ان کے بیٹے سجات امبیڈکر نے سنگین الزامات عائد کیے ہیں۔

پرکاش امبیڈکر نے الزام عائد کیا کہ 'سولاپور کے ایک پولنگ مرکز پر ای وی ایم میں ونچت بہوجن اگھاڑی کے انتخابی نشان کے سامنے والا بٹن دبانے پر بی جے پی کے انتخابی نشان 'کنول' کا پھول پر ووٹ پڑ رہا ہے جس کے بعد ضلع افسر نے ای وی ایم سیل کر کے نئی مشین دی ہے۔'

سولاپور پارلیمانی حلقے میں کانگریس کے سشیل کمار شندے، بی جے پی کے ڈاکٹر جئے سدھیشور شیوآچاریہ اور ونچت بہوجن اگھاڑی کے پرکاش امبیڈکر کے درمیان سخت مقابلہ ہے۔

واضح رہے کہ دوسرے مرحلے میں ریاست کی دس نشستوں پر پولنگ جاری ہے۔ صبح سے پولنگ کے دوران مختلف مقامات پر ای وی ایم مشینوں میں خرابی اور گڑبڑی ہونے کی شکایات میں اضافہ ہوا ہے۔