Mumbai Eid I Milad Procession ممبئی میں جلوسِ عید میلاد کے پیش نظر تیاریوں کا جائزہ

عید میلاد النبی صلی اللہ علیہ وسلم کے پیش نظر ریاستی پولیس نے ممبئی شہر میں سخت حفاظتی انتظامات کیے ہیں وہیں انہوں نے جلوس منتظمین کے لیے ایڈوائزری بھی جاری کی ہے۔

ممبئی:9 اکتوبر کو جلوس عید میلاد النبی صلی اللہ علیہ وسلم کے پیش نظر ممبئی پولیس نے خلافت ہاؤس کمیٹی سمیت جلوس کمیٹیوں اور علماء کرام کی ایک میٹنگ کا انعقاد کیا جس میں پولیس نے جلوس کی تیاریوں سے متعلق جائزہ رپورٹ بھی پیش کی جلوس کے دوران جلوس کمیٹیوں اور شرکاء پر جلوس کے دوران نظم و نسق اور قانون کی پاسداری کرنے کی تلقین کی۔Eid I Milad Procession in Mumbai

علماء کرام نے جلوس عید میلاد النبی صلی اللہ علیہ وسلم کے دوران ڈی جے، ناچ گانے، لہو لعب اور دیگر غیر شرعی امور سے نوجوانوں کو اجتناب کرنے کی درخواست کی ہے ساتھ ہی پولیس کے ساتھ ہر ممکن تعاون کی بھی اپیل کی ہے۔ علماء کرام نے حکام سے جلوس کے دوران شاہراہوں کو بند کیے جانے کی بھی درخواست کی تاکہ جلوس کی گاڑیوں اور شرکاء کا تسلسل برقرار رہے اور اس سے ٹریفک کا مسئلہ بھی ختم ہو جائیگا۔ Maharashtra Eid I Milad procession

جلوس کے منتظم اور خلافت کمیٹی کے کارگزار صدر سرفراز آرزو نے کہا ہے کہ جلوس کے دوران جے جے ناگپاڑہ اور بائیکلہ کی سڑکوں پر ٹریفک کو منتقل کرنے کے ساتھ ان سڑکوں کو بند کیا جائے۔ جو شرکاء جلوس میں موٹر سائیکل پر سوار ہونا چاہتے ہیں وہ اپنی موٹر سائیکلوں پر پرچم رسالت یا جھنڈا لگائیں تاکہ یہ نشاندہی ہو کہ یہ موٹر سائیکل جلوس میں شامل ہونے کی غرض سے آئی ہے ایسے میں دیگر موٹر سائیکل کو جلوس میں شامل ہونے سے روکا جائے۔ Mumbai Police Reviews Eid milad Preparations

رضا اکیڈمی کے سربراہ سعید نوری نے کہا ہے کہ جلوس میں اگر کسی نوجوان سے کوئی غلطی سرزد ہوتی ہے تو اس سے نرمی برتی جائے اور قانونی چارہ جوئی سے گریز کیا جائے کیونکہ اکثر بھیڑ بھاڑ کے دوران کچھ ناخوشگوار چیزیں ہو جاتی ہیں۔ ممبئی امن کمیٹی صدر فرید شیخ نے کہا ہے کہ نوجوان جلوس میں باوضو شامل ہوکر نمازوں کی پابندی کریں اور غیر شرعی امور سے اجتناب کریں۔ اس اہم میٹنگ میں علماء کرام اور عمائدین شہر نے پولیس کو جلوس کے دوران ہر ممکن تعاون کرنے کا یقین دلایا ہے۔

جلوس محمدی صلی اللہ علیہ وسلم کیلئے پولیس تیار

ممبئی پولیس کمشنر وویک پھنسلکر نے علماء کرام کے ساتھ منعقدہ میٹنگ میں یقین دلایا کہ ’’جلوس محمدی صلی اللہ علیہ وسلم بہتر طریقے سے نکالا جائیگا اس کیلئے پولیس پوری طرح سے تیار ہے۔ پولیس کو ضروری اقدامات کرنے کی بھی ہدایات جاری کی گئی ہیں اس کے ساتھ ہی مقامی سطح پر پولیس نے کمیٹیوں کی میٹنگ طلب کرکے ضروری انتظامات کئے ہیں بھیڑ بھاڑ والے علاقوں اور حساس علاقوں میں ضروری حفاظتی انتظامات کئے گئے ہیں۔‘‘

ممبئی میں تقریبا 70 سے زائد مقامات پر جلوس محمدی صلی اللہ علیہ وسلم برآمد ہوتے ہیں، جس میں سینٹرل، ویسٹرن اور نارتھ ریجن میں جلوس نکالے جاتے ہیں، اس میں بڑے پیمانے پر شرکاء شامل ہوتے ہیں جن میں بچے اور عورتیں بھی شامل ہوتی ہیں۔ اس پر بھی پولیس نظر رکھتی ہے۔ جلوس کمیٹیوں سے پولیس نے اپیل کی ہے کہ وہ ٹرک اور ٹیمپو کے اوپری حصے میں نوجوانوں اور بچوں کو نہ بٹھائیں کیونکہ اس سے حادثہ ہونے کا خطرہ رہتا ہے۔

ممبئی پولیس کمشنر نے کہا ہے کہ نوراتری، دسہرہ، دہی ہانڈی، گنیش اتسو اور محرم الحرام پرامن طور سے اختتام پذیر ہوئے ہیں اسی طرح سے عید میلاد النبی صلی اللہ علیہ وسلم بھی پرامن طریقے سے اختتام پذیر ہوگا اور مسلمانوں نے اس جلوس کیلئے ہر ممکن تعاون دینے کی یقین دہانی بھی کروائی ہے ’’مجھے امید ہے کہ اس میں کسی بھی قسم کی کوئی گڑ بڑی پیدا نہیں ہوگی۔‘‘ اس میٹنگ میں جوائنٹ پولیس کمشنر راج وردھن، ایڈیشنل پولیس کمشنر ٹریفک مہیش پاٹل، جوائنٹ پولیس کمشنر نظم و نسق وشواس ناگرے پاٹل، ایڈیشنل کمشنر ایس بی ون راجیو جین سمیت علماء کرام اور عمائدین شہر شریک تھے۔