کانگریس اور بی جے پی کی ساز باز سے پارلیمنٹ کی کارروائی ٹھپ: امتیاز جلیل

مجلس اتحادالمسلمین کے رکن پارلیمان امتیاز جلیل نے کہا کہ کانگریس اور بی جے پی کی ساز باز کے سبب پارلیمنٹ کی کارروائی تین ہفتوں سے ٹھپ ہے جس کی وجہ سے کچھ کام نہیں ہو سکا ہے۔

اورنگ آباد سے ایم آئی ایم کے رکن پارلیمان امتیاز جلیل نے برسراقتدار جماعت بی جے پی اور حزب اختلاف کانگریس پر الزام عائد کیا کہ ان دونوں پارٹیوں کی ساز باز سے پارلیمنٹ کا وقت ضائع ہورہا ہے اور کسی بھی قسم کی کارروائی نہیں ہوپا رہی ہے۔

انہوں نے کہا کہ 'پارلیمنٹ میں ایوان کی کارروائی کو نہ چلنے دینے کے معاملے میں بی جے پی اور کانگریس ایک دوسرے کا تعاون کررہی ہیں۔

امتیاز جلیل نے کہا کہ ملک میں کئی اہم مسائل ہیں جن میں پیگاسس جاسوسی سے لے کر کورونا میں اموات، مہنگائی میں بے تحاشہ اضافہ اور گِرتی معیشیت جیسے شامل ہیں اور ان معاملات پر حکومت کو گھیرا جاسکتا ہے لیکن کانگریس اور بی جے پی کی ملی بھگت سے ایوان کی کارروائی ہنگاموں کی نذر ہورہی ہے۔

انہوں نے کہا کہ ایوان میں اگر سوال اٹھانے کا موقع نہیں دیا گیا تو ہم عوام اور میڈیا کا سہارا لیکر حکومت سے جواب طلب کریں گے۔