مکیش امبانی کی رہائش گاہ کے باہر دھماکہ خیز مواد کے ساتھ اسکارپیو کار برآمد ہوئی تھی۔ جس کے بعد دو روز قبل اے ٹی ایس کی جانب سے تحقیقات شروع کی گئی تھی۔ لیکن اب اس معاملے کو نیشنل انویسٹیگیشن ٹیم کے حوالے کر دیا گیا ہے۔
امبانی کے گھر کے باہر بارودی مواد کے ساتھ کھڑی کار اور متعلقہ کار کے مالک کی مشکوک موت فی الحال زیر بحث ہے۔ اپوزیشن رہنما دیویندر فڑنویس نے اسمبلی میں مطالبہ کیا تھا کہ ان دونوں واقعات کی تحقیقات این آئی اے کے خوالے کی جائے۔
تاہم وزیر داخلہ انیل دیشمکھ نے جمعہ کے روز یہ تحقیقات انسداد دہشت گردی اسکواڈ (اے ٹی ایس) کے حوالے کرنے کا اعلان کیا تھا۔ دریں اثنا صرف تین دن میں مرکز کی جانب سے آج این آئی اے کو یہ کیس سونپ دیا گیا ہے، جس کے بعد ریاستی حکومت نے مرکزی حکومت پر سخت برہمی کا اظہار کیا ہے۔
وزیر اعلی ادھو ٹھاکرے نے کہا 'صوبے میں حزب اختلاف مہاراشٹر کو بدنام کرنے کی کوشش کر رہی ہے۔ وہ ایسا کام کر رہے ہیں جیسے کہ مہاراشٹر میں کوئی جانچ ایجنسی ہی نہیں ہے۔ ہمیں اپنے سسٹم پر مکمل اعتماد ہے۔ لہذا ہم نے معاملے کو تفتیش کے لئے اے ٹی ایس کے پاس بھیج دیا ہے'۔