سیلاب سے متاثرین کی مدد کو مواخات سے منسلک کیا: مفتی اشفاق قاضی

ممبئی کی جامع مسجد کوکن خطے میں آئے سیلاب کے بعد علاقوں کی کفالت میں پیش پیش ہے۔ جہاں لوگ سیلاب کی زد میں آگئے اور تباہ شدہ علاقوں کے لیے روزانہ رسد جمع کی جاتی ہے اور پھر انہیں ٹرکوں کی مدد سے ممبئی سے کوکن پہنچایا جارہا ہے۔

مفتی اشفاق قاضی نے اس موقع کو مواخات سے منسلک کیا اور کہا کہ آج مدد کا نظریہ وہی ہونا چاہیے جو مہاجر اور انصار کے بیچ تھا۔ آج وہی موقع ہے اس تاریخ کو دہرانے کا تاکہ جن لوگوں کا سب کچھ اس سیلاب کی نذر ہوگیا اُن کی زندگی پھر سے ایک بار سنواری جاسکے۔

اس لئے عوام کو اسی طرح سے مدد کے لئے لبّیک کہتے ہوئے بنیادی ضرورتیں جیسے روٹی، کپڑا اور مکان کو فوقیت دینا چاہئے۔

سیلاب سے متاثرین کی مدد کو مواخات سے منسلک کیا :مفتی اشفاق قاضی

جامع مسجد کے چیئرمین شعیب خطیب کہتے ہیں کہ سیلاب کی تباہی کے بعد ہم نے ممبئی کی عوام سے مدد کی اپیل کی جس کے بعد ہر ایک نے اس مدد کے لیے لبّیک کہا۔ کوشش یہی کی جارہی ہے کہ زیادہ سے زیادہ رسد امداد فراہم کی جائے۔ اُن علاقوں میں جامع مسجد کی ٹیم موجود ہے جو ایک منظم طریقے سے لوگوں کی ضروریات پوری کررہی ہے۔ جامع مسجد کی کوشش یہی ہے کہ ضرورت مندوں کی زیادہ سے زیادہ اشیاء رسد کی شکل میں مدد کی جائے۔

جامع مسجد ممبئی کے صدر دروازے پر اسی طرح سے رسد جمع کی جارہی ہے اور پھر ایک ساتھ انہیں ٹرکوں کے ذریعہ سیلاب زدہ علاقوں میں پہنچایا جارہا ہے۔ مدد کے لئے مسجد کا نظریہ متاثرین ہے ناکہ کوئی مخصوص مذہب یا طبقہ۔

جامع مسجد کی تاریخ بہت قدیم ہے اس کی تعمیر كوکنی مسلمانوں نے کی ہے جو دور حاضر میں مسجد کے ساتھ ساتھ کمیونٹی سنٹر، عجائب خانہ اور اسلامی فن تعمیر کا بہترین نمونہ ہے۔