مہاراشٹر نونرمان سینا نے کنگنا رناوت کو متنبہ کیا کہ آپ تشہیر اور سیاست کے لیے بکواس کی باتیں کرسکتی ہیں، لیکن ممبئی شہر کی بدنامی برداشت نہیں کی جائے گی۔
ایم این ایس کے جنرل سکریٹری اکھل چترے نے کنگنا سے کہا کہ ممبئی نہ صرف بھارت بلکہ دنیا کا واحد محفوظ شہر ہے، جہاں آپ رات میں 3 بجے بلا زیادتی و قتل کے خوف سے باہر نکل سکتے ہیں۔کیوں کہ یہ پاکستان نہیں ہے۔
انہوں نے کنگنا رناوت پر نکتہ چینی کرتے ہوئے کہا کہ آپ تشہیر و سیاست کے لیے جو چاہے کہہ سکتے ہو، آپ کوئی بھی تنازع پیدا کرسکتے ہو۔ کیوں کہ آپ ممبئی میں ہو، پاکستان میں نہیں، یہ ماری ممبئی ہے۔اگر یہ پاکستان ہوتا تو آپ جانتے ہوں گے کیسا سلوک کرنا ہے، کیسے بولنا ہے۔
اکھل چترے نے کنگنا کو مشورہ بھی دیا کہ آپ تشہیر و سیاست کے لیے ممبئی اور ممبئی پولیس کو بیچ میں نہ لائیں، آپ اپنا کام جاری رکھیں۔لیکن ممبئی کی بدنامی کسی بھی حالت میں برداشت نہیں کی جائے گی۔
واضح رہے کہ کنگنا نے ٹوئٹ کرکے شیوسینا کے رکن پارلیمان سنجے راوت پر تنقید کرتے ہوئے لکھا تھا کہ سنجے راوت نے انہیں ممبئی نہ آنے کی دھمکی دی، کنگنا نے لکھا کہ ایسا لگ رہا ہےکہ ممبئی میں پی او کے جیسا ماحول بنایا جارہا ہے۔