اردو اساتذہ کے مسائل کے حل کے لیے وزیر تعلیم سے ملاقات

مہاراشٹر کی سابق وزیر تعلیم اور راجیہ سبھا ممبر ڈاکٹر فوزیہ خان کی قیادت میں اکھل بھارتیہ اردو شکشک سنگھ کے اراکین نے موجودہ وزیر تعلیم ورشا گائیکواڑ سے ملاقات کرکے اردو میڈیم کے امیدواروں نیز اساتذہ کے مسائل سے آگاہ کیا۔

اردو اسکولوں کے ساتھ غیر منصفانہ رویہ کے تعلق سے وزیر تعلیم کے ملنے پہنچے وفد کی باتوں کو بغور سننے کے بعد ورشا گائیکواڑ نے یقین دلایا کہ اردو میڈیم اسکولوں کے اساتذہ کی بھرتی میں اردو میڈیم کے امیدواروں کے ساتھ غیر منصفانہ سلوک نہیں کیا جائے گا اسی کے ساتھ اساتذہ کو درپیش مسائل کو بھی حل کرنے کی کوشش کی جائے گی۔

ڈاکٹر فوزیہ خان نے منترالیہ میں وزیر تعلیم ورشا گائیکواڑ سے ملاقات کے دوران تحریری مطالبہ پیش کیا جس میں بتایا گیا کہ پوِتر پورٹل کے توسط سے سنہ 2017 میں اساتذہ کی بھرتی کا عمل شروع کرنے کا فیصلہ کیا گیا تھا جس کے تحت 12 ہزار 147 اسامیوں کا اشتہار شائع کیا گیا تھا جس میں سے صرف 5822 امیدواروں کا انتخاب کیا گیا۔

میمورنڈم میں مزید کہا گیا کہ 'اردو میڈیم کے اساتذہ کی درکار اسامی 966 میں سے 446 اسامیوں پر تقرری کی گئی جبکہ 520 اردو میڈیم آسامیاں ابھی تک پُر نہیں کی گئی۔ فوزیہ خان نے مزید کہا کہ جلد از جلد ٹی ای ٹی امتحان کی تاریخ ڈکلیئر کی جائے۔

اس مطالبے کی کاپیاں وزیر اعلی ادھو ٹھاکرے اور نائب وزیر اعلی اجیت دادا پوار کو بھی دی گئیں۔

واضح رہے کہ 12 اکتوبر کو اکھل بھارتیہ اُردو شِکشک سنگھ کی جانب سے ساجد نثار احمد کی قیادت میں ایک وفد نے فوزیہ خان سے پربھنی میں ملاقات کرکے یہی مطالبہ کیا تھا۔