گورے گاؤں:ممبئی کے گورے گاؤں ویسٹ علاقے میں آج علی الصبح ایک کثیر المنزلہ عمارت میں زبردست آگ لگ گئی۔ اس حادثے میں 7 افراد جھلس کر ہلاک ہو گئے جب کہ 46 لوگ زخمی ہو گئے۔ وہیں اس دوران فائر بریگیڈ کے اہلکاروں نے 30 لوگوں کو بحفاظت بچا لیا۔ فائر بریگیڈ کی کئی گاڑیاں موقع پر پہنچ گئیں۔ ریسکیو ٹیمیں آگ پر قابو پانے میں مصروف ہیں۔ تاحال آگ لگنے کی وجہ معلوم نہیں ہو سکی۔ زخمیوں کا ایچ بی ٹی اور کوپر ہسپتال میں علاج کیا جا رہا ہے۔
جانکاری کے مطابق، صبح تقریباً 3 بجے جے بھوانی بلڈنگ کی پارکنگ میں اچانک زبردست آگ لگ گئی۔ آگ لگنے کی اطلاع ملتے ہی فائر بریگیڈ کی سات سے آٹھ گاڑیاں موقعے پر پہنچ گئیں اور آگ پر قابو پانا شروع کر دیا۔ دریں اثنا، فائر عملے نے عمارت میں پھنسے تقریباً 30 افراد کو بحفاظت نکال لیا۔ واقعہ کے وقت یہاں لوگوں کی بڑی تعداد موجود تھی۔
مزید پڑھیں: Parimpora Fire Incident پارمپورہ میں بھیانک آتشزدگی، سترہ رہائشی شیڈ خاکستر، فائر مین زخمی
Madurai Train Fire Accident مدورائی میں ریلوے کوچ میں آتشزدگی سے دس افراد ہلاک
تازہ ترین معلومات کے مطابق اس واقعے میں تقریباً 46 افراد زخمی ہوئے ہیں۔ ان میں سے کچھ جل بھی گئے ہیں۔ بہت سے لوگ خوفزدہ ہو کر عمارت سے نیچے کود گئے جس کی وجہ سے وہ بری طرح زخمی ہو گئے۔ بتایا جا رہا ہے کہ زخمیوں کا ایچ بی ٹی اور کوپر ہسپتال میں علاج کیا جا رہا ہے۔ کچھ زخمی جوگیشوری کے ٹراما کیئر ہسپتال میں زیر علاج ہیں۔ ممبئی پولیس اور فائر بریگیڈ کے اہلکار بچاؤ اور راحت رسانی کے کاموں میں مصروف ہیں۔ بتایا جا رہا ہے کہ اس آتشزدگی میں پارکنگ میں کھڑی تقریباً 30 کاریں جل کر راکھ ہو گئیں۔ ادھر فائر ڈپارٹمنٹ اور مقامی پولیس اہلکار آگ لگنے کی وجہ کی تحقیقات کر رہے ہیں۔
